"Until the lions have their own historians the history of the hunt will always glorify the hunter...."
- Chinua Achebe

2015, ജനുവരി 22, വ്യാഴാഴ്‌ച

മുല്ലപ്പെരിയാര്‍; 650 ആദിവാസി കുടുംബങ്ങളുടെ കിടപ്പാടം നശിക്കും


തൊടുപുഴ: മുല്ലപ്പെരിയാര്‍ അണക്കെട്ടിലെ ജലനിരപ്പ് 142 അടിയായി ഉയര്‍ത്തുബോള്‍ റിസര്‍വോയറിനകത്തെ കാട്ടിലുളള രണ്ട് ആദിവാസി കുടിലുകള്‍ ഇല്ലാതാവും. 650 ആദിവാസി കുടുംബങ്ങള്‍ക്ക് കിടപ്പാടം നഷ്ടപ്പെടും.

35 വര്‍ഷം കൊണ്ട് രൂപപ്പെട്ട സ്വാഭാവിക വനവും അതിലെ വന്യജീവികളും നശിക്കും. ഈ വിഷയങ്ങള്‍ ഉയര്‍ത്തി നിയമ നടപടിക്ക് ഒരുങ്ങുകയാണ് കേരളം. മുല്ലപ്പെരിയാര്‍ വിധിക്കെതിരെ സുപ്രീംകോടതിയില്‍ നല്‍കിയ റിവ്യൂ ഹര്‍ജിയില്‍ ജലനിരപ്പ് ഉയര്‍ത്തുമ്പോഴുണ്ടാകുന്ന പ്രത്യാഘാതങ്ങള്‍ക്കാണ് മുന്‍ഗണന നല്‍കിയിരിക്കുന്നത്.

റിസര്‍വോയറിന് ചേര്‍ന്നുളള കാട്ടില്‍ മന്നാക്കുടി, പളിയക്കുടി എന്നിങ്ങനെ രണ്ട് ആദിവാസി കുടികളാണുളളത്. കുമളി ഗ്രാമപഞ്ചായത്ത് 11, 12 വാര്‍ഡുകളായ ഇവിടെ 2205 താമസിക്കുന്നുണ്ട്. ജലനിരപ്പ് 136 ല്‍ നിന്ന് 142 അടിയായാല്‍ രണ്ട് കുടികളും വെളളത്തിനടിയിലാകും. ആദിവാസികളുടെ കൃഷിയിടങ്ങളും നശിക്കും.

രണ്ട് കുടികളിലെയും ജനങ്ങളുടെ മുഖ്യതൊഴില്‍ റിസര്‍വോയറിലെ മീന്‍പിടുത്തമാണ്. ചെറുപ്പക്കാരില്‍ 75 ശതമാനവും ട്രൈബല്‍ വാച്ചര്‍, ഇക്കോഡവലപ്‌മെന്റ് സമിതി ഗൈഡ് എന്നിങ്ങനെ ജോലിചെ യ്യുന്നവരാണ്. വെളളകയറി കാട് നശിച്ചാല്‍ ഇവര്‍ക്ക് വീടും സ്ഥലവും മാത്രമല്ല, തൊഴിലും നഷ്ടപ്പെടും. 

2005 ല്‍ പാസ്സാക്കി, 2007 ജനുവരി 2 മുതല്‍ നിലവില്‍ വന്ന കേന്ദ്ര വനാവകാശ നിയമപ്രകാരം ആദിവാസികള്‍ക്ക് കാട്ടിനുളളില്‍ അവരിഷ്ടപ്പെടുന്ന സ്ഥലത്ത് താമസിക്കാനും കൃഷിയിറക്കാനും ഉളള അവകാശം നല്‍കിയിട്ടുണ്ട്. 142 അടിയായി ജലനിരപ്പ് ഉയര്‍ത്തിയാല്‍ ആദിവാസികളുടെ ഈ അവകാശമാണ് ലംഘിക്കപ്പെടുന്നത്.

ആദിവാസികള്‍ക്ക് കിടപ്പാടം നഷ്ടപ്പെടുന്നതും സ്വാഭാവിക വനവും വന്യജീവികളും നശിക്കുന്നതും ഉള്‍പ്പെടെയുളള പ്രശ്‌നങ്ങള്‍ പരിഹരിച്ച ശേഷം ജലനിരപ്പ് ഉയര്‍ത്തിയാല്‍ മതിയെന്ന നിലപാടിലാണ് കേരളം. പ്രശ്‌നത്തില്‍ ദേശീയ മനുഷ്യാവകാശ കമ്മീഷന്‍ ഇടപെട്ട് പരിഹാരം കാണണമെന്നും ആവശ്യപ്പെടുന്നുണ്ട്. 

സുപ്രീംകോടതി വിധിക്കെതിരെ നല്‍കിയ റിവ്യുഹര്‍ജി പരിഗണിക്കുബോള്‍ കേരളം ഈ വിഷയങ്ങളായിരിക്കും മുഖ്യമായി ഉന്നയിക്കുക. പ്രശ്‌നം കേന്ദ്രസര്‍ക്കാരിന്റെ ശ്രദ്ധയിലും കൊണ്ടുവരും. 

വേണ്ടി വന്നാല്‍ പുതിയ ഹര്‍ജി നല്‍കണമെന്ന് അഭിപ്രായവും ഉയര്‍ന്നിട്ടുണ്ട്. ജലനിരപ്പ് 142 അടി ആകുമ്പോള്‍ ഉണ്ടാകുന്ന പ്രത്യാഹാതങ്ങള്‍ പരിഹരിക്കാന്‍ കേന്ദ്രസര്‍ക്കാരിനും തമിഴ് നാടിനും ബാധ്യതയുണ്ടെന്നും അധികൃതര്‍ പറയുന്നു.

കേരളത്തിന്റെ ആശങ്കകള്‍ ഉള്‍ക്കൊളളുന്ന വിശദമായ റിപ്പോര്‍ട്ട് മുല്ലപ്പെരിയാര്‍ മേല്‍നോട്ട സമിതി അദ്ധ്യക്ഷന് നല്‍കിയിട്ടുണ്ട്. കേരള മന്നാന്‍ സമുദായ സംഘടന ദേശീയ മനുഷ്യാവകാശ കമ്മീഷനും നിവേദനം നല്‍കിയിട്ടുണ്ട്.