"Until the lions have their own historians the history of the hunt will always glorify the hunter...."
- Chinua Achebe

2015, ജനുവരി 19, തിങ്കളാഴ്‌ച

'ഘര്‍ വാപസി'യും അംബേഡ്കര്‍ ചൂണ്ടിക്കാണിച്ച ഹിന്ദുമതത്തിലെ പ്രഹേളികകളും


image courtesy 
മുമ്പ് ക്രിസ്തുമതം സ്വീകരിച്ച പട്ടികജാതിക്കാരെ തിരികെ പട്ടികജാതിക്കാരാക്കുന്നതിനായി ഹിന്ദുക്കള്‍ രാജ്യവ്യാപകമായി നടപ്പാക്കുന്ന പരിപാടിയാണ് 'ഘര്‍ വാപസി'

തൊട്ടുകൂടാത്തവര്‍ (പട്ടികജാതിക്കാര്‍) ഹിന്ദുക്കളല്ലെന്ന് അംബേഡ്കര്‍ വ്യക്തമാക്കിയിട്ടുണ്ട്. അതിനാല്‍ത്തന്നെ അസ്പൃശ്യര്‍ (തൊട്ടുകൂടാത്തവര്‍) ക്രിസ്തുമതം സ്വാകരിച്ചതിനെ 'ഹിന്ദു' ക്രിസ്തുമതം സ്വീകരിച്ചു എന്ന് പറയാനാവില്ല. അപ്പോള്‍പ്പിന്നെ അസ്പൃശ്യരെ ഹിന്ദുക്കളാക്കുന്നു എന്നാവാം ഇതിനര്‍ത്ഥം. മറ്റൊരര്‍ത്ഥം, ക്രിസ്തുമതം സ്വീകരിച്ച അസ്പൃശ്യരെ ഹിന്ദുക്കളാക്കുന്നു എന്നതാകാം ഈ പരിപാടികൊണ്ട് ഉദ്ദേശിക്കുന്നത്. അങ്ങനെയെങ്കില്‍, അസ്പൃശ്യതയിലേക്ക് പരിവര്‍ത്തിപ്പിക്കുന്ന തിലൂടെ, ജാതികേന്ദ്രിതമായ സാമൂഹികവ്യവസ്ഥ തിരികെ കൊണ്ടുവരുന്നതിനുള്ള ഗൂഢതന്ത്രമല്ലേ ഇതിന് പിന്നില്‍?. 

എപ്രകാരം അസപൃശ്യര്‍ ഹിന്ദുക്കളാകുന്നില്ല?

ഓരോ മതത്തിനും അവരടെ ദൈവങ്ങളും ഉത്ഭവ കാരണങ്ങളും ഉണ്ട്. മറ്റു മതങ്ങളെപ്പോലെ ഹിന്ദുമതത്തിന്റെ സാമൂഹ്യ ഘടന ഏകശിലാരൂപിയല്ല. നാലുവര്‍ണങ്ങളുടെ ശ്രേണീ ബദ്ധമായ ഘടനയാണ് അതിനുള്ളത്. ബ്രാഹ്മണര്‍, ക്ഷത്രിയര്‍, വൈശ്യര്‍, ശൂദ്രര്‍ എന്നിവരാണ് ആ ശ്രേണിയിലെ ഘടകങ്ങള്‍. ഈതില്‍ ഏറ്റവും മുകളിലുള്ള ബ്രാഹ്മണര്‍ക്കാണ് സര്‍വ അധികാരങ്ങളും അവകാശങ്ങളും ഉള്ളത്. അതിനു താഴോട്ടുള്ള ഘടകങ്ങള്‍ക്ക് അനുക്രമമായി അധികാരങ്ങള്‍ കുറഞ്ഞുവരുന്നു. അസ്പൃശ്യര്‍ ഈ ശ്രേണിയില്‍ പെടുന്നില്ല. അതുകൊണ്ട് അസപൃശ്യന്‍ ഹിന്ദുവല്ല.

നാലുവര്‍ണങ്ങളുടേയും ഉത്ഭവസ്ഥാനങ്ങളും പ്രാധാന്യങ്ങളും തുല്യമല്ല. ബ്രാഹ്മണന്‍ ബ്രഹ്മാവിന്റെ മുഖത്തുനിന്നും ക്ഷത്രിയന്‍ നെഞ്ചില്‍ നിന്നും വൈശ്യന്‍ തുടകളില്‍ നിന്നും ശൂദ്രന്‍ പാദങ്ങളില്‍ നിന്നുമാണ് പിറവി കൊണ്ടിട്ടുള്ളത് എന്നാണ് ഹിന്ദു പ്രമാണങ്ങളിലെ അനുശാസനകള്‍. അസ്പൃശ്യന്‍ എവിടെ നിന്ന് ജനിച്ചു എന്ന് അതില്‍ പറയുന്നില്ല. അസ്പൃശ്യന്‍ ഹിന്ദുവായിരുന്നെങ്കില്‍ അതിന്റെ സൂചനകളും അതില്‍ കാണണമല്ലോ?

അസമത്വത്തിന്റെ സാമൂഹ്യഘടനയാണ് ചാതുര്‍വര്‍ണ്യത്തിനുള്ളത്. ഗുണം, കര്‍മ്മം എന്നിവയനു സരിച്ചാണ് വര്‍ണം വേര്‍തിരിക്കപ്പെട്ടിരിക്കുന്നത്. ഓരോ വര്‍ണത്തിനും ഏറ്റക്കുറച്ചിലുകള്‍ ഉള്ളതുപോലെ ഗുണകര്‍മ്മങ്ങളും ശ്രേണീബദ്ധമാണ്. വര്‍ണം നാലെണ്ണമാണെങ്കില്‍ ഗുണങ്ങള്‍ മൂന്നെണ്ണമേയുള്ളൂ. സത്വം, രജസ്, തമസ് എന്നിവയാണ് മൂന്നുഗുണങ്ങള്‍. ഏറ്റവും മുന്തിയ ഗുണമായ സത്വം ബ്രാഹ്മണന് കല്പിക്കപ്പെട്ടിരിക്കുന്നു. സര്‍വ വിധത്തിലുമുള്ള സദ്ഗുണങ്ങളുടേയും സാകല്യ മാണ് സത്വം. ലോഹങ്ങളില്‍ വെച്ച് സ്വര്‍ണത്തിനും പ്രകാശത്തിനുമൊക്കെയുള്ള മുന്തിയ സ്ഥാനം. രണ്ടാമത്തെ ഗുണമായ രജസ് ക്ഷത്രിയനും വൈശ്യനും പൊതുവേ കല്പിക്കപ്പെട്ടിരിക്കുന്നു. ലോഹങ്ങ ളില്‍ വെച്ച് സ്വര്‍ണത്തേക്കാള്‍ പ്രകാശം കുറഞ്ഞ വെള്ളിയുടെ മധ്യമസ്ഥാനം. മൂന്നാമത്തെ ഗുണമായ തമസ് സര്‍വ വിധത്തിലുമുള്ള ദുര്‍ഗുണങ്ങളുടെ സാകല്യമാണ്. ലോഹങ്ങളില്‍ വെച്ച് പ്രകാശമൊട്ടുമില്ലാത്ത ഇരുമ്പിന്റെ - ഇരുട്ട് - ന്റെ അധമസ്ഥാനം. ഇത് ശൂദ്രനു മാത്രമായി കല്പിക്കപ്പെട്ടിരിക്കുന്നു. അപ്പോള്‍ മേല്‍വര്‍ണികര്‍ക്ക് അവരുടെ സര്‍വ വിധത്തിലുമുള്ള ജീര്‍ണതകളും ചൊരിയുന്നതിനുള്ള വസ്തുവായാണ് വര്‍ണവ്യവസ്ഥക്ക് അകത്തുതന്നെയുള്ള ശൂദ്രനെ പാകപ്പെടു ത്തിയിരിക്കുന്നത് എന്ന് കാണാം. കഴിക്കുന്ന ആഹാരത്തിലും ധരിക്കുന്ന വസ്ത്രത്തിലുമെല്ലാം ശൂദ്രന് ഈ പരിതാപകരമായ അവസ്ഥയാണുള്ളത്. ശൂദ്രന്‍ പഴകിയ ആഹാരമേ കഴിക്കാവൂ. കീറിപ്പഴകിയ വസ്ത്രമേ ധരിക്കാവൂ.. എന്തിന്, അവന്‍ തനിക്കിടുന്ന പേര് നിന്ദാസൂചകം ആയിരിക്കണം എന്നു പോലും നിഷ്‌കര്‍ഷയുണ്ട്.

കര്‍മ്മം.

കര്‍മ്മം തന്നെയാണ് ധര്‍മ്മം. വ്യവസ്ഥയനുസരിച്ച് മേല്‍ വര്‍ണികനായ ബ്രാഹ്മണന് വിദ്യാഭ്യാസം ചെയ്യുക എന്ന ഒറ്റ കര്‍മ്മമേയുള്ളൂ. ക്ഷത്രിയന് രാജ്യം ഭരിക്കലും യുദ്ധം ചെയ്യുക എന്നതും. കൃഷി, ഗോരക്ഷ, വാണിജ്യം എന്നിവയാണ് വൈശ്യന്റെ കര്‍മ്മങ്ങള്‍. ഏറ്റവും അതിശയകരമായ വസ്തുത ശൂദ്രന് സവിശേഷമായ ഒരു കര്‍മ്മം വിധിച്ചിട്ടില്ല എന്നതാണ്. തനിക്ക് മേലുള്ള മൂന്ന് വര്‍ണക്കാ രേയും സേവിക്കുക എന്നതാണ് ശൂദ്രന് വിധിച്ചിട്ടുള്ള 'കര്‍മ്മം' ! (പരിചര്യാത്മകം കര്‍മ്മം ശൂദ്രസ്യാപി ച സഹജം.) ഇതാണ് വര്‍ണ വ്യവസ്ഥ ശൂദ്രനോട് ചെയ്ത ഏറ്റവും ഭീകരമായ മറ്റൊരു ചതി എന്ന് വേര്‍തിരിച്ചറിയേണ്ടതുണ്ട്. നാല് വര്‍ണങ്ങള്‍ക്കുമുള്ള ഈ കര്‍മ്മങ്ങള്‍ ആരും ഏല്‍പ്പിച്ചുകൊടുത്ത തല്ല, ജന്മനാ തന്നെയുള്ളതാണ്. അതാണ് 'സഹജം' എന്ന വാക്കുകൊണ്ട് ഉദ്ദേശിക്കുന്നത്. ശൂദ്രന്‍ ഒഴിച്ച് മറ്റ് മൂന്നു വര്‍ണക്കാര്‍ക്കും രണ്ട് ജന്മങ്ങളുണ്ട്. ഒന്ന് ഗര്‍ഭപാത്രത്തില്‍ നിന്നും രണ്ടാമത്തേത് വിദ്യാഭ്യാസം ചെയ്തു കഴിഞ്ഞും സംഭവിക്കുന്നു. അവരെ ദ്വിജന്മാര്‍ എന്നു വിളിക്കുന്നു. അവരാണ് പൂണൂല്‍ ധരിക്കുന്നത്. ശൂദ്രന് വിദ്യാധികാരമില്ല. അതുകൊണ്ട് അവന്‍ ദ്വിജനുമല്ല, പൂണൂല്‍ ധരിക്കാന്‍ അവകാശവുമില്ല. അസമത്വത്തിലധിഷ്ഠിതമായ ഹിന്ദുവിന്റെ ഈ സാമൂഹ്യ വ്യവസ്ഥയെ സോഷ്യലിസം (സമത്വം) എന്നു വിളിക്കാമോ? എന്തായാലും അസപൃശ്യര്‍ ഇതില്‍ പെടാത്തതുകൊണ്ടു കൂടി അവര്‍ ഹിന്ദുക്കളാകുന്നില്ല.

ജനിക്കുമ്പോള്‍ എല്ലാവരും ശൂദ്രരായാണ് ജനിക്കുന്നതെന്നും, കര്‍മ്മം ചെയ്താണ് മറ്റു വര്‍ണങ്ങളായി മാറുന്നതെന്നും ഒരു വാദമുണ്ട്. അങ്ങനെ കര്‍മ്മം മാറ്റാന്‍ വ്യവസ്ഥയില്ലെന്നു മാത്രമല്ല, കര്‍മ്മം ചെയ്യാന്‍ മാത്രമേ അധികാരമുള്ളൂ എന്നും ശാസനകളുണ്ട്. 'കര്‍മ്മണ്യേവാധികാരസ്‌തേ' (കര്‍മ്മം ചെയ്യാന്‍ മാത്രമേ നിനക്ക് അധികാരമുള്ളൂ) 'മാ ഫലേഷു കദാചന' (ഒരിക്കലും അതിന്റെ ഫലം ഇച്ഛിക്കരുത്) 'മാ കര്‍മ്മഫലഹേതുര്‍ഭൂമോ തേ ശങ്കേസ്തുവകര്‍മ്മണി ' - ഭഗവത് ഗീത. (കര്‍മ്മഫലം ലഭിക്കില്ല എന്നു കരുതി കര്‍മ്മം ചെയ്യാതിരിക്കുകയുമരുത്) അപ്പോള്‍ ബ്രാഹ്മണന് വിദ്യാഭ്യാസം ചെയ്യാനും ക്ഷത്രിയന് യുദ്ധം ചെയ്യാനും വൈശ്യന് കച്ചവടം ചെയ്യാനും ശൂദ്രന് ഈ മൂന്നു മേല്‍ വര്‍ണികരേയും സേവിക്കാനും മാത്രമേ അധികാരമുള്ളൂ, അത് മാറ്റാന്‍ വ്യവസ്ഥയില്ല! ഉണ്ടായിരുന്നു വെങ്കില്‍, മൂന്ന് മേല്‍ വര്‍ണികരുടേയും സര്‍വമാനമായ ജീര്‍ണതകളും പേറേണ്ടിവരുന്ന ശൂദ്രന്‍ അതുതന്നെ തുടരാന്‍ ആഗ്രഹിക്കുമോ? അവന്‍ കര്‍മ്മം മാറ്റി, വിദ്യാഭ്യാസം ചെയ്ത് ബ്രാഹ്മണനാകാ നല്ലേ ആഗ്രഹിക്കുക? തപസു ചെയ്ത് കര്‍മ്മം മാറ്റാന്‍ ശ്രമിച്ച ശംബൂകന്റെ ഗതി എന്തായി? എന്തായാലും അസ്പൃശ്യന്‍ വര്‍ണബാഹ്യനായതുകൊണ്ട് അവനെ സംബന്ധിക്കുന്ന ഒരു പ്രശ്‌നമല്ല ഇത്. അസ്പൃശ്യനല്ലാതായിത്തീര്‍ന്ന അവനെ തിരികെ അസ്പൃശ്യനാക്കാന്‍ ഹിന്ദു എന്തിന് താത്പര്യം കാണിക്കണം? അഥവാ ഇക്കാര്യത്തില്‍ ഹിന്ദുവിന്റെ താത്പര്യമെന്താണ്?

ഹിന്ദുവിന്റെ 'ധര്‍മ്മം' ജീവകാരുണ്യ പ്രവര്‍ത്തനമാണെന്നാണ് അസ്പൃശ്യരും ധരിച്ചുവെച്ചിരിക്കുന്നത്. അസ്പൃശ്യനെ ഹിന്ദു എങ്ങനെ കാണുന്നു എന്നതിന് ശങ്കരാചാര്യരുടെ ഈ ശാസന ഉദാഹരണം-

'ശൂദ്രാദി സ്പര്‍ശനേ സ്‌നാനം
കാര്യം ശുദ്ധിമദീപ്‌സതാ
അന്ത്യജാനാം സന്നികര്‍ഷേ
ചാപിമഞ്ജനമാചരേത്'

ശുദ്ധിയെ കാംക്ഷിക്കുന്ന ദ്വിജന്‍ ശൂദ്രാദികളെ തൊട്ടാല്‍ കുളിക്കണം. അന്ത്യജന്മാര്‍ (അസ്പൃശ്യര്‍) അരികിലണഞ്ഞാല്‍ പോലും കുളിക്കണം.

ഇപ്പോള്‍ ഘര്‍ വാപസിയിലൂടെ തിരികെ അസ്പൃശ്യരായിരിക്കുന്ന- പട്ടികജാതിക്കാരോട്, നിങ്ങളെ കണ്ടമാത്രയില്‍ത്തന്നെ ഹിന്ദുക്കള്‍ കുളിച്ചിട്ടുണ്ടാകും. (ഹിന്ദുവിന്റെ നിലപാടുകള്‍ മാറ്റാന്‍ വ്യവസ്ഥ യില്ല എന്ന് അറിഞ്ഞല്ലോ. അത് 'സനാതനം' ആണ്. സനാതനമെന്നാല്‍ എന്നെന്നേക്കും പൂര്‍വ സ്ഥിതം. മാറ്റാന്‍ വ്യവസ്ഥയുള്ളത് സനാതനമാവില്ല എന്നും അറിയുക) ഈ അവമതിക്ക് ഇനിയും നിങ്ങള്‍ സ്വമേധയാ നിന്നു കൊടുക്കുകയാണോ? പൗരാവകാശം വിനിയോഗിച്ച് സര്‍വിധ അധികാരവുമുള്ള മനുഷ്യനായി മാറാനുള്ള അവസരം നിങ്ങളെന്തിന് തുലച്ചുകളയുന്നു. അടിമത്വം നിങ്ങള്‍ക്ക് അത്രക്ക് സുഖകരമായ ഒന്നാണോ?