"Until the lions have their own historians the history of the hunt will always glorify the hunter...."
- Chinua Achebe

2015, ഫെബ്രുവരി 27, വെള്ളിയാഴ്‌ച

കല്ല്‌ : ഔസേഫ് ചിറ്റക്കാട്












തിരിച്ചടികള്‍ ഭയന്ന് കല്ലുരുട്ടാതെ
ജപമാല ചൊല്ലി മൗനത്തിലാവുന്നത്
കൊടിയ ഭീരുത്വമാണ്
തിരിച്ചടികള്‍ ഉണ്ടായാലും ഇല്ലെങ്കിലും
കല്ല് ഉരുട്ടിക്കൊണ്ടേയിരിക്കണം
അതിന്നിടയില്‍ ഇടതുകാലിലെ മന്ത്
വലതുകാലിലേക്ക് അല്ലെങ്കില്‍
വലതുകാലില്‍നിന്നും ഇടതുകാലിലേക്ക്
കൂടുമാറിയെന്നു വരാം
കല്ല് ഉരുട്ടിക്കൊണ്ടേയിരിക്കണം
ഇടയ്‌ക്കൊന്നു തളര്‍ന്നാല്‍
സ്വന്തം ശിരസ്സു തന്നെ പിളര്‍ന്ന്
കയരിവന്ന വഴിയിലൂടെ കല്ല്
അതിവേഗം താഴേക്ക്
ഉരുണ്ടിറങ്ങാം
ഉശിരോടെ മുകളിലെത്തിച്ച്
അത്യാഹ്ലാദപൂര്‍വ്വം
ഒന്നു കൈകൊട്ടിയാലോ
മറുവഴിയിലൂടെ കല്ല്
അതിവേഗം താഴേക്കു തന്നെ
ഉരുണ്ടിറങ്ങാം
കാലം അതിന്റെ ചരിത്രപഥങ്ങളിലൂടെ
ആവര്‍ത്തനവരിസത തെല്ലുമില്ലാതെ
പഠിച്ചുകൊണ്ടേയിരിക്കുവാന്‍
നാം കല്ല് ഉരുട്ടിക്കൊണ്ടേയിരിക്കണം.