"Until the lions have their own historians the history of the hunt will always glorify the hunter...."
- Chinua Achebe

2015, ഫെബ്രുവരി 26, വ്യാഴാഴ്‌ച

ജാതി വിരുദ്ധപോരാട്ടങ്ങളെ രാഷ്ട്രീയമായി തകര്‍ക്കുന്ന ഘര്‍ വാപ്പസിയില്‍ നിന്നും സംഘപരിവാര്‍ ശക്തികള്‍ പിന്‍മാറണം - മാത്യു ഇടശ്ശേരി


മാത്യു ഇടശ്ശേരി 
സംഘപരിവാര്‍ ശക്തികളുടെ ഹിന്ദുരാഷ്ട്രവാദ അജണ്ട പൂര്‍വ്വാധികം ശക്തമാക്കുന്ന നയപരിപാടിയാണ് വിശ്വഹിന്ദുപരിഷത്തും, ജനജാഗരണ്‍മഞ്ചും നടപ്പിലാക്കുന്ന ഘര്‍ വാപ്പസി പരിപാടി. ഇന്‍ഡ്യയിലെ തദ്ദേശീയ ജനവിഭാഗങ്ങളെ മതപരിവര്‍ത്തനവും, പുനര്‍മതപരിവര്‍ത്തനവും നടത്തി സ്വത്വബോധത്തെ തകര്‍ക്കാനുള്ള ശ്രമങ്ങളെ ദലിതര്‍ ഒന്നടങ്കം പ്രതിരോധിക്കണം. ഹൈന്ദവവര്‍ഗ്ഗീയതയുടെ ബലിയാടുകളായി മാറിയ ദലിതര്‍ സാമൂഹ്യാഭിമാനത്തിനും സാമൂഹ്യനീതിയ്ക്കും വേണ്ടി ഡോ. അംബേദ്ക്കര്‍ തിരികൊളുത്തിയ ജാതി വിരുദ്ധ പോരാട്ടങ്ങളെ ഉള്‍ക്കൊണ്ട് ഒരു മതേതരജനതയെന്ന നിലയില്‍ വികസിച്ച് സ്വത്വബോധം വീണ്ടെടുക്കുന്ന ഘട്ടത്തില്‍ മനുവാദ ഹൈന്ദവ ഫാസിസ്റ്റുകള്‍ അതിനെ രാഷ്ട്രീയമായി തകര്‍ക്കാനുള്ള ആസൂത്രിത നീക്കമായാണ് ഘര്‍ വാപ്പസി പരിപാടിയിലൂടെ ആവിഷ്‌ക്കരിച്ചിരിക്കുന്നത്. 1936- ലെ ക്ഷേത്രപ്രവേശന വിളമ്പരത്തിനു മുമ്പ് ഹിന്ദുമതത്തിനു പുറത്ത് ബഹിഷ്‌കൃതരായി ഇരകളാക്കപ്പെട്ട് ജീവിക്കുന്ന സാമൂഹ്യ അവസ്ഥയാണുണ്ടായിരുന്നത്. അങ്ങനെ ഹിന്ദുമതത്തിന്റെ അകത്തില്ലാതിരുന്ന തദ്ദേശീയരെ ഘര്‍ വാപ്പസ്സി പരിപാടിയിലൂടെ ഏതു കുടുംബത്തിലേയ്ക്കാണ് തിരിച്ചുകൊണ്ടുപോകുന്നത് എന്ന് സംഘപരിവാര ശക്തികള്‍ വ്യക്തമാക്കണം. 1950-ആഗസ്റ്റ് 10-ലെ പ്രസിഡന്‍ഷ്യല്‍ ഓര്‍ഡറിലൂടെ ഹൈന്ദവരായാലെ സംവരണം ലഭിയ്ക്കു എന്ന സാഹചര്യം സൃഷ്ടിയ്ക്കുകയും ഹിന്ദുമിഷനിലൂടെ പുനര്‍മതപരിവര്‍ത്തനത്തിനു തുടക്കം കുറിച്ചുകൊണ്ടുമാണ് ഡോക്ടര്‍ അംബേദ്ക്കര്‍ ആവിഷ്‌ക്കരിച്ച ജാതിസംവരണത്തെ മതാധിഷ്ഠിത സംവരണമാക്കി അട്ടിമറിച്ചത്. ഇന്ത്യന്‍ ഭരണകൂടം കാലാകാലമായി അനുവര്‍ത്തിച്ചുവരുന്ന ഹൈന്ദവ ധര്‍മ്മത്തെ ബി.ജെ.പി നരേന്ദ്രമോദിയിലൂടെ ശക്തമാക്കുകയാണ് ഇപ്പോള്‍ ചെയ്തുവരുന്നത്. ഘര്‍ വാപ്പസിലൂടെ പൂര്‍വ്വജാതി സമ്പ്രദായം പുന:സൃഷ്ടിയ്ക്കുന്ന മനുവാദ അജണ്ട സാക്ഷാത്ക്കരിക്കാനാണ് സംഘപരിവാര ശക്തികള്‍ ശ്രമിക്കുന്നത്. എന്നാല്‍ സംവരണത്തെ സംബന്ധിച്ച് കേന്ദ്ര-സംസ്ഥാന ഗവണ്‍മെന്റുകള്‍ നാളിതുവരെ നിയമിച്ചിട്ടുള്ള എല്ലാ കമ്മീഷനുകളും അവസാനമായി ജസ്റ്റിസ് രംഗനാഥമിശ്ര കമ്മീഷന്‍ റിപ്പോര്‍ട്ടുവരെ 1950-ലെ പ്രസിഡന്‍ഷ്യല്‍ ഓര്‍ഡര്‍ റദ്ദുചെയ്യണമെന്നും സംവരണം മതാതീതമാക്കണമെന്നും ശുപാര്‍ശ ചെയ്യുന്നു. രംഗനാഥമിശ്രകമ്മീഷന്‍ ശുപാര്‍ശയിന്‍മേല്‍ ശക്തമായ രാഷ്ട്രീയ തീരുമാനം എടുത്ത് സംവരണം മതാതീതമാക്കുന്നതിനുള്ള നടപടി സ്വീകരിച്ചാല്‍ ദലിത് ക്രൈസ്തവര്‍ക്കും ദലിത് മുസ്ലീം വിഭാഗങ്ങള്‍ക്കും സംവരണാനുകൂലങ്ങള്‍ ലഭ്യമാക്കുകയും മതപരിവര്‍ത്തനവും പുനര്‍മത പരിവര്‍ത്തനവും അപ്രസക്തമാവുകയും ചെയ്യുമെന്നും അതിനായി നിയമ നിര്‍മ്മാണമല്ല ശക്തമയാ രാഷ്ട്രീയ തീരുമാനങ്ങളാണ് ആവശ്യം.

മാത്യു ഇടശ്ശേരി
ജനറല്‍ സെക്രട്ടറി,
നാഷണല്‍ ദലിത് ക്രിസ്ത്യന്‍ ഫെഡറേഷന്‍,