"Until the lions have their own historians the history of the hunt will always glorify the hunter...."
- Chinua Achebe

2015, മേയ് 17, ഞായറാഴ്‌ച

മത്സ്യബന്ധനമേഖല: യഥാര്‍ത്ഥ പ്രശ്‌നങ്ങള്‍ ഞെട്ടിക്കുന്നതാണ്! - ദേവദാസ് ക്ലാപ്പന

കേരളത്തില്‍ ഇതുവരെ നടത്തിയ ആസൂത്രണ പ്രവര്‍ത്തനങ്ങളുടെ ഗുണഫലങ്ങള്‍ അര്‍ഹിക്കുവിധം എത്തിച്ചേരാത്ത ജനവിഭാഗമാണ് മത്സ്യത്തൊഴിലാളികള്‍. കേരളത്തിലെ പട്ടികജാതി - പട്ടികവര്‍ഗ ജനവിഭാഗ ങ്ങളെ പോലെ കോളനികളില്‍ താമസിക്കുന്നവരാണ് ഇന്നും മത്സ്യത്തൊഴിലാളികള്‍. ഉപജീവനാര്‍ത്ഥം ജീവന്‍ പോലും പണയപ്പെടുത്തി കടലിന്റെ ആഴക്കയങ്ങളില്‍ പോയി മത്സ്യം പിടിക്കുന്ന ഇവര്‍ പൊതുസമൂഹത്തില്‍ ഏറ്റവും കുറഞ്ഞ നിരക്കില്‍ ഏറ്റവും കൂടുതല്‍ പോഷകമൂല്യമുള്ള ഭക്ഷ്യവസ്തു പ്രദാനം ചെയ്യുകയും രാജ്യത്തിന്റെ സമ്പദ്ഘടനക്ക് ഏറെ വിലപ്പെട്ട വിദേശനാണ്യം നേടിത്ത രുന്ന വരുമാണ്. കേരളത്തിലെ പ്രതിശീര്‍ഷ മത്സ്യ ഉപഭോഗം ഒരു വര്‍ഷത്തില്‍ 28 കി. ഗ്രാമാണ്. ഇത് ദേശീയ ശരാശരിയുടെ ഏകദേശം മൂന്ന് ഇരട്ടിയോളമാണ്. മത്സ്യോത്പന്ന കയറ്റുമതി വികസന അതോറിട്ടി യുടെ (MPEDA) രേഖകള്‍ പ്രകാരം 2013-14 സാമ്പത്തിക വര്‍ഷം 1,65,698 മെട്രിക് ടണ്‍ മത്സ്യം കയറ്റുമതി ചെയ്തതില്‍ നിന്നും 4706.36 കോടി രൂപക്ക് തുല്യമായ വിദേശ നാണ്യമാണ് രാജ്യത്തിന് കേരളത്തിലെ മത്സ്യത്തൊഴിലാളികളുടെ സംഭാവന. തൊഴില്‍പരമായ പ്രത്യേകതകള്‍ കൊണ്ട്തന്നെ മത്സ്യത്തൊഴിലാളികള്‍ കടല്‍ തീരങ്ങളിലും കായല്‍ തീരങ്ങളിലും കൂട്ടമായി താമസിക്കുന്നവരാണ്. ഉപജീവനത്തിന് കടലിന്റേ യും കായലിന്റേയും സാമീപ്യം അത്യന്താപേക്ഷിത മായതിനാലാണിത്.

കേരളത്തിലെ മത്സ്യത്തൊഴിലാളികളുടെ ആകെ എണ്ണം 10,01,625 ആണ്. ഇതില്‍ കടല്‍ മത്സ്യ മേഖലയിലുള്ളവര്‍ 7,71,249 ഉം ഉള്‍നാടന്‍ മത്സ്യ മേഖലയിലുള്ളവര്‍ 2,60,327 ഉം ആണ്. സമുദ്രമേഖലയിലെ പുരുഷന്മാര്‍ 3,02,140 ഉം സ്ത്രീകള്‍ 2,70,624 ഉം കുട്ടികള്‍ 1,98,484 ഉം ഉള്‍നാടന്‍ മത്സ്യമേഖലയില്‍ ഇവ യഥാക്രമം 89439, 86085, 54798 എന്നിങ്ങനെയാണ്. (അവലംബം - ഫിഷറീസ് ഡയറക്ടറേറ്റ് സാമ്പത്തിക അവലോകനം റിപ്പോര്‍ട്ട് 2014)

2013 - 14 ലെ സംസ്ഥാനത്തെ മൊത്തം ആഭ്യന്തര ഉത്പാദനമായ 2,26,208.5 കോടി രൂപയില്‍ മത്സ്യബന്ധന മേഖലയുടെ സംഭാവന 1926.85 കോടി രൂപയാണ് (0.85%). ഇത് 2006 - 07 ല്‍ യഥാക്രമം 1,41,666.69 കോടി രൂപയും 1800.24 കോടി രബപയും (1.27%)ഉം ആയിരുന്നു. ഇത് സമ്പദ്ഘടനയിലും പൊതു സമൂഹത്തിന്റെ ഭക്ഷ്യ സുരക്ഷയിലും നിര്‍ണായകമായ സംഭാവന നല്‍കുന്ന മത്സ്യത്തൊഴിലാളികളോട് എന്നും അവഗണനാപരമായ സമീപനമാണ് സ്വീകരിക്കുന്നത്. വിവിധ സര്‍ക്കാരു കള്‍ ആവിഷ്‌കരിച്ച വികസന നയങ്ങളുടെ ഫലമായി കൂടുതല്‍ ദാരിദ്ര്യവത്കരിക്കപ്പെട്ട വരായി മത്സ്യത്തൊഴിലാളി സമൂഹം മാറി. മത്സ്യത്തൊഴി ലാളികളെ പൊതുസമൂഹം 'നാറ്റത്തൊഴിലുകാര്‍' എന്ന പേരില്‍ സമൂഹത്തിന്റെ പിന്നാമ്പുറങ്ങളിലേക്ക് ആട്ടിപ്പായിച്ചവരാണ്.

പൊതു അവസ്ഥ

മത്സ്യത്തൊഴിലാളി കുടുംബങ്ങളില്‍ 26% കുടുംബങ്ങളും ഭൂരഹിതരാണ്. 9% കുടുംബങ്ങള്‍ പുറംപോക്കില്‍ താമസിക്കുന്നു. 8.5% കുടുംബങ്ങള്‍ സര്‍ക്കാര്‍ ഭൂമിയില്‍ താമസിക്കുന്നു.

പട്ടിക 1 ഭൂമിയുടെ അവകാശം

ഭൂരഹിതര്‍ - 25.4%
5 സെന്റ് വരെ - 49.4%
6-10 സെന്റ് വരെ - 24.2%
11-50 സെന്റ് വരെ - 0.8%
51-100 സെന്റ് വരെ - 0.1
100-500 സെന്റ് വരെ 0.1%


25125 കുടുംബങ്ങള്‍ ഇപ്പോഴും കൂരകളില്‍ താമസിക്കുന്നു. 23.8% കുടുംബങ്ങള്‍ പൂര്‍ണമായും, 21.4% കുടുംബങ്ങള്‍ ഭാഗികമായും കുടിവെള്ളക്ഷാമം നേരിടുന്നവരുമാണ്. 12.43% കുടുംബങ്ങള്‍ക്കും കക്കൂസ് ഇല്ല. 34.3% കുടുംബങ്ങളില്‍ മാത്രമേ ശുചിത്വ സൗകര്യമുള്ളൂ.

പട്ടിക 2. വീട് മത്സ്യബന്ധന മേഖലയില്‍

വാസയോഗ്യം 30.3%
അറ്റകുറ്റപ്പണികള്‍ ആവശ്യമുള്ളത് 48.2%
വാസയോഗ്യമല്ലാത്തത് 21.5%

പട്ടിക 3. കുടിവെള്ളം ലഭ്യത. മത്സ്യബന്ധന മേഖലയില്‍

പൂര്‍ണമായും കുടിവെള്ളം ലഭ്യമല്ലാത്തത് 23.8%
ഭാഗികമായി കുടിവെള്ള ലഭ്യതയുള്ളത് 21.4%
കുടിവെള്ള ലഭ്യതയുള്ളത് 54.8%

(അവലംബം: പട്ടിക 1,2,3 സാമൂഹിക സാമ്പത്തിക സര്‍വേ 2004, മത്സ്യമേഖലയിലെ വര്‍ക്കിങ് കമ്മിറ്റി റിപ്പോര്‍ട്ട് 12 ആം പഞ്ചവത്സര പദ്ധതി)

2013-14 സംസ്ഥാന പ്രതിശീര്‍ഷ വരുമാനം (2004-05 ലെ സ്ഥിര വിലയില്‍) 66,862 രൂപയായിരിക്കുമ്പോള്‍ മത്സ്യത്തൊഴിലാളികളുടെ പ്രതിശീര്‍ഷ വരുമാനം 30,000 രൂപയില്‍ താഴെ മാത്രമാണ്. (സാമ്പത്തിക അവലോകന റിപ്പോര്‍ട്ട് -2014)

പട്ടിക 4. ശരാശരി വാര്‍ഷിക വരുമാനം. മത്സ്യബന്ധന മേഖലയില്‍

1000 രൂപക്ക് താഴെ 53.6%
1000 - 2500 രൂപ 28.9%
2500 - 5000 രൂപ 16.3%
5000 - 7500 രൂപ 0.5%
7500 രൂപക്ക് മുകളില്‍ 0.7%

(അവലംബം: മത്സ്യ മേഖലയിലെ വര്‍ക്കിങ് ഗ്രൂപ്പ് റിപ്പോര്‍ട്ട് 12 ആം പഞ്ചവത്സര പദ്ധതി)

മത്സ്യത്തൊഴിലാളികളുടെ കഠിനാധ്വാനത്തിന്റെ തീവ്രതയും തൊഴില്‍ രംഗത്തെ അപകട സാധ്യതയും പരിഗണിക്കുമ്പോള്‍ ഈ വരുമാനം തുലോം തുച്ഛമാണ്. കുടുംബം പുലര്‍ത്തുന്നതിനു വേണ്ടി മത്സ്യത്തൊ ഴിലാളി സ്ത്രീകള്‍ മത്സ്യം തലയില്‍ ചുമന്നു കൊണ്ട്, കിലോ മീറ്ററു കളോളം നടന്ന് വില്പന നടത്തുന്നുണ്ട്. മത്സ്യ ബന്ധനോ പകരണങ്ങള്‍ വാങ്ങുന്നതിനും അവയുടെ അറ്റകുറ്റപ്പണി കള്‍ക്കുമായി വ്യക്തികളില്‍ നിന്നും ധനകാര്യ സ്ഥാപനങ്ങലില്‍ നിന്നും കടം വാങ്ങി മത്സ്യത്തൊഴി ലാളികള്‍ കടക്കാരായി മാറുന്നു. ഭവന നിര്‍മാണം, ചികിത്സാ ചെലവ്, എന്നിവയും മത്സ്യത്തൊഴി ലാളികളെ കടക്കെണി യില്‍ വീഴ്ത്തുന്നു. മത്സ്യത്തൊഴിലാളികളുടെ ശരാശരി കടബാധ്യത 50,000 രൂപയാണെന്ന് കണക്കാക്കപ്പെടുന്നു. 

പിടിക്കുന്ന മീനിന്റെ വില നിശ്ചയിക്കുവാന്‍ മത്സ്യത്തൊഴിലാളികള്‍ക്ക് അധികാരമില്ല. വില നിശ്ചയിക്കുന്നതും മത്സ്യക്കമ്പോളങ്ങളെ നിയന്ത്രിക്കു ന്നതും ഇടത്തട്ടുകാരാണ്. ഒരു വര്‍ഷം ശരാശരി 4500 കോടി രൂപയുടെ മത്സ്യം കേരളത്തിലെ ആഭ്യന്തര കമ്പോളങ്ങളില്‍ വിറ്റഴിയുന്നുണ്ട്. ഇതില്‍ മത്സ്യത്തൊഴിലാളിക്ക് ലഭിക്കുന്നത് 2500 കോടി രൂപ മാത്രമാണ്. ബാക്കി 2000 കോടി രൂപയും ഇടത്തട്ടുകാരുടെ കൈകളിലേക്ക് പോകുന്നു.

മത്സ്യത്തൊഴിലാളി കള്‍ക്കിടയിലെ സാക്ഷരതാ നിരക്ക് 85.84% മാത്രമാണ്. ഇത് കേരളത്തിലെ 94.86% മാണ്. മത്സ്യത്തൊഴിലാളി കുട്ടികളില്‍ 25.56% മാത്രമാണ് സെക്കന്ററി വിദ്യാഭ്യാസം നേടുന്നത്. സ്‌കൂളില്‍ നിന്നുള്ള കൊഴിഞ്ഞു പോക്ക് 14.6% മാണ്. ഇത് കേരളത്തിന്റേത് 0.48% മാണ്.

മത്സ്യത്തൊഴിലാളി മേഖലയിലെ ആരോഗ്യ സംവിധാനങ്ങള്‍ വളരെ താണ നിലവാരം പുലര്‍ത്തുന്നവയാണ്. കുടിവെള്ളത്തിന്റേയും ശുചിത്വ സംവിധാനങ്ങളുടേയും അപര്യാപ്തത, പകര്‍ച്ച വ്യാധികളും ജലജന്യ രോഗങ്ങളും പടര്‍ന്ന് പിടിക്കുന്നതിന് കാരണമാകുന്നു. പീലിങ് ഷെഡുകളില്‍ ജോലിചെയ്യുന്ന സ്ത്രീകള്‍ക്ക് അണ്ഡാശയ രോഗങ്ങള്‍, സന്ധിവാതം, ശ്വാസകോശ രോഗങ്ങള്‍ എന്നിവ പിടിപെടുന്നു. 

പട്ടിക 5. ആരോഗ്യ സൂചകം. മത്സ്യബന്ധന മേഖലയില്‍

(സൂചകം, കേരളം, മത്സ്യബന്ധന മേഖല ന്നെീ ക്രമത്തില്‍)

സ്ത്രീ പുരുഷ അനുപാതം 1032 972
ജനസംഖ്യാവര്‍ധന നിരക്ക് 1.9 2.3
ശിശുമരണ നിരക്ക് (1000ന്) 40 85
പൂര്‍ണ വളര്‍ച്ചയെത്താത്ത പ്രസവ നിരക്ക് (1000ന്) 16.1 26.7

(അവലംബം: വര്‍ക്കിംങ് ഗ്രൂപ് റിപ്പോര്‍ട്ട് 12 ആം പഞ്ചവത്സര പദ്ധതി)

ആസൂത്രണത്തിലും വികസനത്തിലും സാമൂഹ്യ നീതിയിലും മറ്റുള്ളവര്‍ക്ക് മാതൃകയെന്നു പറയുന്ന കേരളത്തിലെ ഒരു സമൂഹത്തിന് ഇതൊക്കെ എങ്ങനെ നിഷേധിക്കപ്പെട്ടു?

1) മത്സ്യത്തൊഴിലാളികള്‍ സംഘടിതരല്ല; ഒരു സാമൂഹ്യ ശക്തിയായോ, രാഷ്ട്രീയ ശക്തിയായോ മാറാന്‍ കേരളത്തിലെ മത്സ്യത്തൊഴിലാളി കള്‍ക്കായില്ല. അതുകൊണ്ടുതന്നെ കേരളത്തിലെ വികസനത്തിന്റെ പങ്കില്‍ തങ്ങള്‍ക്ക് അവകാശപ്പെട്ടത് പിടിച്ചുപറ്റാന്‍ കഴിഞ്ഞില്ല. 

2) മാറിമാറി അധികാരത്തില്‍ വരുന്ന സര്‍ക്കാരുകളുടേയും വിവിധ രാഷ്ട്രീയ പ്രസ്ഥാനങ്ങളുടേയും ബോധപൂര്‍വമായ അവഗണന; മത്സ്യ മേഖലയിലെ പ്രശ്‌നങ്ങള്‍ ഗൗരവമായി പഠന വിധേയമാക്കുവാനോ ശാശ്വത പരിഹാരം കാണാനോ സര്‍ക്കാരുകളോ വിവിധ രാഷ്ട്രീയ പാര്ട്ടികളോ ശ്രമിച്ചില്ല. സംഘടിതരോ വോട്ടബാങ്ക് വിഭാഗമോ അല്ലാ ത്തതുകൊണ്ട് തന്നെ അവകാശങ്ങള്‍ക്കും സമ്മര്‍ദ്ദങ്ങള്‍ക്കും വഴങ്ങി മത്സ്യ മേഖലയില്‍ നയങ്ങള്‍ രൂപീകരിക്കേണ്ടി വരുന്നില്ല. പൊതു സമ്പത്തും വികസനവും സംഘടിതര്‍ക്കും വോട്ടുബാങ്ക് ഗ്രൂപ്പുകള്‍ക്കുമായി വീതിച്ചു നല്കുന്ന വികസന നയമായിരുന്നു അധികാരത്തിലെ ത്തിയപ്പോഴെല്ലാം രാഷ്ട്രീയ പ്രസ്ഥാനങ്ങള്‍ സ്വികരിച്ചത്. 

3) വിവിധ ജാതിമത സംഘടനകളുടെ അപ്രമാദിത്വ നേതൃത്വം; ജാതി മത സംഘടനാ നേതൃത്വങ്ങള്‍ക്ക് എല്ലായ്‌പ്പോഴും മത്സ്യത്തൊഴിലാളികളെ തങ്ങളുടെ നിയന്ത്രണത്തില്‍ നിര്‍ത്താന്‍ കഴിഞ്ഞു. ഈ സംഘടനകള്‍ക്ക് സാമൂഹിക സാമ്പത്തിക തൊഴില്‍ രംഗങ്ങളിലെ ദ്രുത ഗതിയിലുള്ള മാറ്റങ്ങളെ ഉള്‍ക്കൊള്ളാനോ അതിനനുസരിച്ച് നയപരിപാടികള്‍ ആവിഷ്‌കരിച്ച മത്സ്യത്തൊഴിലാളി സമൂഹത്തെ പരിഷ്‌കരിക്കാനോ ജനാധിപത്യ വത്കരിക്കാനോ ഈ സംഘടനകള്‍ക്കായില്ല. ആരാധനാലയ ങ്ങള്‍ക്കും സംഘടനാ നേതൃത്വങ്ങള്‍ക്കും ആവശ്യാനുസരണം സംഭാവന നല്കാനുള്ള വിഭാഗം എന്ന നിലയില്‍ മാത്രമാണ് മത്സ്യത്തൊഴിലാളി സമൂഹത്തെ അവരുടെ മേല്‍ സ്വാധീനമുള്ള ജാതി - മത സംഘടനകള്‍ കണ്ടത്.

4) അന്ധവിശ്വാസങ്ങളിലും അനാചാരങ്ങളിലും അധിഷ്ഠിതമായ ജീവിത രീതികള്‍, ജാതി - മത നേതൃത്വങ്ങള്‍ അടിച്ചേല്പിക്കുന്ന സാമൂഹ്യ അന്ധവിശ്വാസങ്ങളില്‍ നിന്നും മത്സ്യത്തൊഴിലാളികള്‍ മോചിതരല്ല. ജനന - മരണ ചടങ്ങുകള്‍ അമിതമായ അന്ധവിശ്വാസാചാരങ്ങള്‍ തുടങ്ങിയവ ഇതിന് ഉദാഹരണം.


ദേവദാസ് ക്ലാപ്പന 
3. തൊഴില്‍ രംഗം

590 കിലോമീറ്റര്‍ നീളമുള്ള കടല്‍ തീരവും 46,129 ഹെക്ടര്‍ വിസ്തീര്‍ണം വരുന്ന പരസ്പരബന്ധിതമായ 49 കായലുകളും ഉള്‍പെടെ 1,43,696 ഹെക്ടര്‍ വിസ്തീര്‍ണമുള്ള ഓരുജല പ്രദേശവും ഉള്‍പ്പെടുന്നതാണ് കേരളത്തിലെ മത്സ്യബന്ധന രംഗം.

ഇപ്പോഴത്തെ പ്രത്യേക സാഹചര്യത്തില്‍ കടല്‍ മത്സ്യബന്ധന മേഖല മാത്രം പരിശോധനാ വിഷയമാക്കുന്നു.

കേരള തീരദേശത്തോടടുത്തുള്ള വാഡ്ജ് ബങ്ക്, കൊല്ലം ബങ്ക്, ചേറ്റുവ വാഡ്ജ് ബങ്ക് എന്നിവ പ്രധാനപ്പെട്ട മത്സ്യ - ജൈവവൈവിധ്യ കേന്ദ്രങ്ങളാണ്. ഇവയെ ആശ്രയിച്ചാണ് നമ്മുടെ ബന്ധന മേഖലയുടെ നിലനില്പ്.

2011-12 ല്‍ 22,902 മത്സ്യബന്ധന യാനങ്ങളാണ് കേരള മറൈന്‍ ഫിഷറീസ് റെഗുലേഷന്‍ ആക്ട് അനുസരിച്ച് കേരളത്തില്‍ രജിസ്റ്റര്‍ ചെയ്തിട്ടുള്ളത്. ഇതില്‍ 2380 എണ്ണം എല്ലാ യന്ത്രവത്കൃത ബോട്ടുകളും, 19,028 എണ്ണം, മോട്ടോര്‍ ഘടിപ്പിച്ച വള്ളങ്ങളും, 1494 എണ്ണം പരമ്പരാഗത വള്ളങ്ങളു മാണ്. ഇവ കൂടാതെ രജിസ്റ്റര്‍ ചെയ്യാത്ത ധാരാളം മത്സ്യബന്ധന യാനങ്ങളും നമ്മുടെ കടല്‍ത്തീരത്തുണ്ട്. മത്സ്യബന്ധന സമ്മര്‍ദ്ദം (ഫിഷിങ് പ്രഷര്‍) നമ്മുടെ തീരത്ത് വളരെ കൂടുതലാണ്. ഇത് കേരളത്തില്‍ 100 ച. കി. മീ. വിസ്തീര്‍ണത്തിന് 1043 മത്സ്യത്തൊഴിലാളികളാണ്.

കടല്‍ മത്സ്യ സമ്പത്തിന് ഏറെ ദോഷകരമല്ലാത്ത രീതികളിലായിരുന്നു ഇന്തോ - നോര്‍വീജിയന്‍ പദ്ധതിക്ക് മുമ്പുവരെ നമ്മുടെ മത്സ്യ ത്തൊഴിലാളികള്‍ മത്സ്യബന്ധനം നടത്തിയിരുന്നത്. 5 മുതല്‍ 15 വരെ ആളുകള്‍ പോകുന്ന വള്ളങ്ങളില്‍ തണ്ടു വലിച്ച് പോയി ഉപരിതല മത്സ്യങ്ങളെ പിടിക്കുകയായിരുന്നു ആദ്യകാല രീതികള്‍. ചെറുവള്ള ങ്ങളില്‍ പോയി ചൂണ്ട ഉപയോഗിച്ചും കരയില്‍ നിന്നും വലിക്കാവുന്ന കമ്പവല ഉപയോഗിച്ചും അക്കാലത്ത് മത്സ്യബന്ധനം നടത്തിയിരുന്നു. സാധാരണക്കാരന്റെ മെച്ചപ്പെട്ട ഭക്ഷണങ്ങളായിരുന്ന മത്തി, ഐല, നത്തോലി, പരവ, എന്നീ മത്സ്യങ്ങളായിരുന്നു അന്ന് സുലഭമായി കിട്ടിയിരുന്നത്.

ആഴക്കടല്‍ മത്സ്യസമ്പത്ത് ചൂഷണം ചെയ്യുക എന്ന ഉദ്ദേശ്യത്തോടുകൂടി ആരംഭിച്ച ഇന്തോ - നോര്‍വീജിയന്‍ പ്രോജക്ടായിരുന്നു മത്സ്യ സമ്പത്തിന്റെ അനിയന്ത്രിതമായ ചൂഷണത്തിന് വഴിതെളിച്ച ആദ്യ പദ്ധതി. സാധാരണക്കാരന് ഭക്ഷ്യവസ്തു പ്രദാനം ചെയ്യുന്ന ജീവനമാര്‍ഗം എന്ന അവസ്ഥയില്‍ നിന്നും വിദേശ കമ്പോളങ്ങളില്‍ പ്രിയമുള്ള ചരക്ക് ഉത്പാദന മേഖലയായി മത്സ്യബന്ധന രംഗം മാറി. മോട്ടോര്‍ ഘടിപ്പിച്ച ബോട്ടുകളില്‍, അടക്കംകൊല്ലി, പഴ്‌സീന്‍, പലാജില്‍ വലകള്‍ ഉപയോഗിച്ച് ആഴക്കടലില്‍ പോയി വിപണന മൂല്യമുള്ള കൊഞ്ച്, കണവ, ചൂര, ആവോലി, കിളിമീന്‍ എന്നിവയെ പിടിക്കാന്‍ സര്‍ക്കാര്‍ മത്സ്യത്തൊഴി ലാളികളെ പ്രേരിപ്പിച്ചു. ബോട്ടുകളും അനുബന്ധ ഉപകരണങ്ങളും സ്വന്തമായി ഇറക്കാന്‍ അത്താഴപ്പട്ടിണിക്കാരായ മത്സ്യത്തൊഴിലാളികള്‍ക്ക് കഴിയുമായിരുന്നില്ല. ഈ സാഹചര്യത്തിലാണ് മൂലധന ശക്തികള്‍ കടലിലും കടല്‍ സമ്പത്തിലും തങ്ങളുടെ ലാഭം കൊയ്തുകൂട്ടാനുള്ള മേച്ചില്‍പുറങ്ങളായി കണ്ടത്. 

അന്നുവരെ കടലിന്റെ മക്കളായിരുന്ന മത്സ്യത്തൊഴിലാളികള്‍ കടലില്‍ നിന്നും അന്യവത്കരിക്കാന്‍ തുടങ്ങി. മുതലാളിമാര്‍ക്ക് ലാഭം കുന്നുകൂട്ടു ന്നതിനും വേണ്ടി കടലമ്മയെ അമിതമായി ചൂഷണം ചെയ്യുന്ന തൊഴിലാളിയായി അവന്‍ മാറി. കണ്ണിവലിപ്പം കുറവുള്ള പഴ്‌സീന്‍ - പെലാജറ്റില്‍ വലകള്‍ ഉപയോഗിച്ച് നടത്തിയ മത്സ്യബന്ധനത്തിന്റെ ഫലമായി ഉപയോഗപ്രദമായ (വാണിജ്യമൂല്യമുള്ള) വലിയ മത്സ്യങ്ങളോ ടൊപ്പം ചെറിയ മീനുകള്‍, മുട്ടകള്‍ എന്നിവയെ കൂടി ഇവര്‍ കോരിയെടു ത്തു. മുട്ടകളെ കൂടിന നശിപ്പിച്ചതോടെ ഇപ്പോഴത്തെ മാത്രമല്ല, ഭാവിയില്‍ കിട്ടാന്‍ സാധ്യതയുണ്ടായിരുന്ന മത്സ്യ സമ്പത്തിനെ കൂടി നശിപ്പിച്ചു.

വിപണന മൂല്യമുള്ള മത്സ്യബന്ധനം ശക്തിപ്പെട്ടതോടെ കടല്‍ത്തീരത്ത് മൂലധന ശക്തികള്‍ സ്വാധീനമുറപ്പിച്ചു. ബോട്ടുടമകള്‍, മത്സ്യ കയറ്റുമതി ക്കാര്‍, ഐസ് ഫാക്ടറി ഉടമകള്‍, ലേലക്കാര്‍, തരകന്മാര്‍, ഇടത്തട്ടുകാര്‍, പണം കടം കൊടുക്കുന്നവര്‍, തുടങ്ങി മത്സ്യബന്ധനവുമായി യാതൊരു ബന്ധവുമില്ലാത്ത ഒരു വിഭാഗം മത്സ്യബന്ധന രംഗത്ത് ആധിപത്യം സ്ഥാപിക്കുകയും ജാതി - മത നേതൃത്വങ്ങളുടെ പിന്തുണയോടെ മത്സ്യത്തൊഴിലാളികളുടെ മേല്‍ അധീശത്വം സ്ഥാപിക്കുകയും ചെയ്തു.

4. മത്സ്യബന്ധന രംഗത്തേക്ക് വിദേശ കുത്തകകള്‍

ലോകത്തിലെ ഏറ്റവും സമൃദ്ധവും ജൈവവൈവിധ്യവുമായ മത്സ്യ സമ്പത്തുള്ളത് ഇന്ത്യന്‍ സമുദ്രതീരത്തായിരുന്നു (പ്രത്യേകിച്ച് ഇന്ത്യയുടെ പടിഞ്ഞാറന്‍ കടല്‍തീരം)

രാജ്യത്തിന്റെ എല്ലാ സമ്പത്തും യഥേഷ്ടം ചൂഷണം ചെയ്യുന്നതിന് വിദേശ കുത്തകകള്‍ക്ക് അവസരം നല്കിയ 1991 ലെ ഉദാരവത്കരണ - ആഗോളവത്കരണ നയങ്ങളുടെ തുടര്‍ച്ചയായിരുന്നു ഇന്ത്യന്‍ കടലും കടല്‍സമ്പത്തും അരിച്ചു പെറുക്കുന്നതിന് വിദേശ മത്സ്യബന്ധന കപ്പലുകള്‍ക്ക് ലൈസന്‍സ് നല്‍കിയത്. വിപണന മൂല്യമുള്ള മത്സ്യങ്ങളെ കണ്ടെത്തി കൂട്ടത്തോടെ പിടിച്ചെടുത്ത് മൂല്യവര്‍ധിത ഉത്പന്നങ്ങളാക്കു ന്നതിനുള്ള സാങ്കേതിക വൈദഗ്ധ്യവുമുള്ള വലിയ ഫിഷിങ് വെസ്സലുകള്‍ ഇന്ത്യന്‍ കടല്‍ത്തീരങ്ങള്‍ അരിച്ചു പെറുക്കിയതോടെ പരമ്പരാഗത മത്സ്യത്തൊഴിലാളികള്‍ മാത്രമല്ല, ഈ രംഗത്തേക്ക് നേരത്തേ വന്ന പുത്തന്‍ പണക്കാരും പട്ടിണിയുടെ കയത്തിലേക്ക് വീണു. 1990കളുടെ മധ്യത്തില്‍ ഇതിനെതിരേ മത്സ്യത്തൊഴിലാളികളുടെ ശക്തവും വ്യാപകവുമായ പ്രതിഷേധം ഉയര്‍ന്നു. ഇതിനെ തുടര്‍ന്നാണ് 1995 ല്‍ ഡോ. പി മുരാരി അധ്യക്ഷനായി മത്സ്യമേഖലയിലെ പ്രശ്‌നങ്ങളെ കുറിച്ച് പഠിക്കാന്‍ കമ്മീഷനെ നിയോഗിച്ചത്. 1996 സെപ്തംബറില്‍ ഡോ. മുരാരി കമ്മീഷന്‍ റിപ്പോര്‍ട്ട് സര്‍ക്കാരിന് സമര്‍പ്പിച്ചു. മത്സ്യബന്ധനത്തിന്റെ പരിപോഷണത്തിന് കുറേയേറെ ഗുണകരമായ നിര്‍ദ്ദേശങ്ങളാണ് ഈ കമ്മീഷന്‍ മുന്നോട്ടു വെച്ചത്. മത്സ്യബന്ധന മേഖലയിലെ എല്ലാ സംയുക്ത സംരംഭങ്ങളുടേയും പെര്‍മിറ്റുകള്‍ അടിയന്തിരമായി റദ്ദു ചെയ്യുക, പുതിയ ലൈസന്‍സുകള്‍ അനുവദിക്കാതിരിക്കുക , നിലവിലുള്ള ലൈസന്‍സുകള്‍ പുതുക്കുകയോ കാലാവധി ദീര്‍ഘിപ്പിക്കുകയോ ചെയ്യരുത് തുടങ്ങി മത്സ്യ സമ്പത്തും മത്സ്യത്തൊഴിലാളികളുടെ അവകാശ ങ്ങളും സംരക്ഷിക്കുന്നതിന് പാര്‍ലമെന്റ് സമഗ്ര നിയമനിര്‍മ്മാണം നടത്തുക, എന്നിവ മുരാരി കമ്മീഷന്റെ പ്രധാന നിര്‍ദ്ദേശങ്ങളായിരുന്നു. എന്നാല്‍ മുരാരി കമ്മീഷന്‍ റിപ്പോര്‍ട്ടിനെ ഗൗരവമായി പരിഗണിക്കാനോ അതിനുവേണ്ട നടപടികള്‍ സ്വീകരിക്കാനോ തുടര്‍ന്നുവന്ന സര്‍ക്കാരുകള്‍ തയാറായില്ല എന്നു മാത്രമല്ല ഇന്ത്യന്‍ കടല്‍ത്തീരം വീണ്ടും വിദേശ കുത്തകകള്‍ക്ക് അടിയറ വെക്കുന്ന നിര്‍ദ്ദേശങ്ങളടങ്ങിയ ഡോ. മീനാകുമാരി കമ്മീഷന്‍ റിപ്പോര്‍ട്ട് നടപ്പിലാക്കാന്‍ ഇപ്പോഴത്തെ സര്‍ക്കാര്‍ തീരുമാനിക്കുകയും ചെയ്തു.

200 നോട്ടിക്കല്‍ മൈല്‍ വരെയുള്ള ഇന്ത്യയുടെ ആഴക്കടലില്‍ വിദേശ കപ്പലുകളടക്കം 1178 ആഴക്കടല്‍ ഫിഷിങ് വെസലുകള്‍ക്ക് പ്രവര്‍ത്തി ക്കാന്‍ അനുമതി നല്കണം, ഇതില്‍ 270 എണ്ണമെങ്കിലും പുതിയത് അനുവദിക്കണം, അന്ത്യന്‍ കമ്പനികളുടെ മത്സ്യബന്ധന കപ്പലുകളില്‍ ചുരുങ്ങിയത് 2 വിദേശ തൊഴിലാളികളെയെങ്കിലും നിയമിക്കണമെന്നും ഇവരെ നിയമിക്കുന്നതിനുള്ള നിയമന തടസങ്ങള്‍ ഒഴിവാക്കണമെന്നും മീനാകുമാരി കമ്മീഷന്‍ ശുപാര്‍ശ ചെയ്യുന്നു. വിദേശ മത്സ്യബന്ധന കപ്പലുകളെ സംയുക്ത സംരംഭങ്ങള്‍ എന്ന നിലയിലോ വാടകകൊടുത്തോ പ്രവര്‍ത്തിക്കാന്‍ അനുവദിക്കണം. തീരത്തിനടുത്ത് 200 മീറ്റര്‍ മുതല്‍ 500 മീറ്റര്‍ വരെ ആഴം വരുന്ന മേഖലയെ കരുതല്‍ മേഖലയായി പ്രഖ്യാപി ക്കണമെന്നും ഈ മേഖലയില്‍ തദ്ദേശ മത്സ്യബന്ധന രീതികള്‍ പാടില്ലെന്നും മീനാകുമാരി കമ്മീഷന്‍ റിപ്പോര്‍ട്ട് ശുപാര്‍ശ ചെയ്യുന്നു. 

200 നോട്ടിക്കല്‍ വരെയുള്ള കടലില്‍ വിദേശ കുത്തകകള്‍ക്ക് അവസരം നല്കണമെന്നും തീരത്തിനടുത്ത് 200 മീറ്റര്‍ ആഴം വരെ മത്സ്യബന്ധനം പാടില്ലെന്നും പറയുന്നതിലൂടെ ശരിക്കും വിദേശ കുത്തകകള്‍ക്ക് പിടിക്കാനുള്ള മത്സ്യങ്ങളുടെ നഴ്‌സറികളും ഫിഷിംങ് ഗ്രൗണ്ടുമായി 200 മീറ്റര്‍ മുതല്‍ 500 മീറ്റര്‍ വരെയുള്ള കരുതല്‍ മേഖലയെ മാറ്റിത്തീര്‍ക്കുക എന്നതാണ് കമ്മീഷന്റെ ലക്ഷ്യം. ഇതിന്റെ ചുവടു പിടിച്ച് കേന്ദ്ര കൃഷി മന്ത്രാലയം പുറപ്പെടുവിച്ച ഉത്തരവ് അനുസരിച്ച് 6 വിഭാഗങ്ങളില്‍ പെടുന്ന ബോട്ടുകള്‍ക്ക് ആഴക്കടല്‍ മീന്‍പിടുത്തത്തിന് അനുമതി ലഭിക്കും. 

1) ചൂരയെ പിടിക്കാനുള്ള നീണ്ട ചൂണ്ട ഘടിപ്പിച്ച ബോട്ടുകള്‍, 2) പഴ്‌സീന്‍ വലകളുള്ള ബോട്ടുകള്‍, 3) മീന്‍പിടുത്ത കൂടുകളും ചൂണ്ടകളും ഉപയോഗിക്കുന്ന ബോട്ടുകള്‍, 4) കൂന്തല്‍ വര്‍ഗങ്ങളെ പിടിക്കുന്ന ജിഗ്ഗുകള്‍ 5) ഉപരിതല മത്സ്യങ്ങളെ പിടിക്കുന്ന ബോട്ടുകള്‍ 6) പോളുകളും ലൈനുകളും ഉപയോഗിക്കുന്ന ബോട്ടുകള്‍ എന്നിവക്കാണ് ലൈസന്‍സ് നല്കുന്നത്.

ഈ ഫിഷിങ് വെസലുകള്‍ എല്ലാം തങ്ങള്‍ക്ക് ആവശ്യമുള്ള വാണിജ്യ മൂല്യമുള്ള മത്സ്യങ്ങളെ മാത്രം മൂല്യവര്‍ധിത ഉത്പന്നമാക്കുകയും ഇതിനോടൊപ്പം ലഭിക്കുന്ന മറ്റു മീനുകളെ കൊന്ന് കടലില്‍ തള്ളുക യുമാണ് ചെയ്യുന്നത്. ഈമീനുകളാണ് നമ്മുടെ തൊഴിലാളികള്‍ക്ക് ലഭിക്കേണ്ടിയിരുന്നത്.

പട്ടിക 6. കേരളത്തിലെ സമുദ്ര മത്സ്യബന്ധനത്തിന്റെ ഇനം തിരിച്ചുള്ള കണക്കുകള്‍ - മെട്രിക് ടണ്ണില്‍

ഇനം 2010-11, 2011-12, 1012-13, 2013-14 വര്‍ഷങ്ങള്‍ എന്നീ ക്രമത്തില്‍

ഷാര്‍ക്ക് 3001, 2906, 2884, 2873
മത്തി 151839, 151941, 143595, 140383
നത്തോലി 31949, 32011, 31511, 30857
കണവ 30468, 29945, 29358, 29444
ചുണ്ണാമ്പുവാള 15196, 15175, 14776, 14585
ആവോലി 1543, 1533, 1522, 1498
അയല 44991, 44485, 42696, 43916
നെയ്മീന്‍ 2537, 2508, 2496, 2411
ചൂര 12062, 11910, 10458, 10562
കണമ്പ് 858, 856, 852, 849
കൊഞ്ച് 47620, 46948, 44587, 42126
ഞണ്ട് 4527, 4513, 4465, 4457

പട്ടിക 7 മത്സ്യോത്പാദനം കേരളത്തില്‍ (ലക്ഷം ടണ്ണില്‍)

2009-10 5.7
2010-11 5.6
2011-12 5.53
2012-13 5.31
2013-14 5.22

(അവലംബം: പട്ടിക 6,7 സാമ്പത്തിക അവലോകന റിപ്പോര്‍ട്ട് 2014)

മുകളില്‍ സൂചിപ്പിച്ച 2 പട്ടികകളില്‍ നിന്ന് വ്യക്തമാകുന്നത് കേരളത്തിലെ കടല്‍ മത്സ്യോത്പാദനം ക്രമാനുഗതമായി കുറഞ്ഞു വരുന്നുവെന്നാണ്. ഇതിന്റെ മുഖ്യ കാരണം കടല്‍ മത്സ്യ സമ്പത്തില്‍ നടത്തിയ അനിയ ന്ത്രിതവും കച്ചവട ക്കണ്ണോടു കൂടിയ ചൂഷണവും അതിന്റെ ഫലമായ മത്സ്യ സമ്പത്തിന്റെ ശോഷണവുമാണ്. വിദേശ ട്രോളറുകള്‍ ഇന്ത്യന്‍ കടല്‍ തീരങ്ങളില്‍ നടത്തുന്ന മത്യബന്ധന രീതികള്‍, കാലാവസ്ഥാ വ്യതിയാനം കടല്‍ പരിസ്ഥിതിയെ തകര്‍ക്കുന്ന മലിനീകരണം, കടല്‍ മത്സ്യ സമ്പത്തിന്റെ പരിപോഷണത്തിന് സഹായകമായ നദികളുടേയും കായലുകളുടേയും ജലാശയങ്ങളുടേയും വ്യാപകമായ നികത്തലുകളും അവയുടെ മലിനീകരണങ്ങളും (ഈ നദികളും ജലാശയങ്ങളും വഹിച്ചുകൊണ്ടു വരുന്ന ചെറു ജീവികള്‍, സൂക്ഷ്മ ജീവകങ്ങള്‍ എന്നിവ കടല്‍ മത്സ്യങ്ങളുടെ ഭക്ഷണങ്ങളായിരുന്നു) ഇവയെല്ലാം നമ്മുടെ കടല്‍ മത്സ്യോത്പാദനത്തെ പ്രതികൂലമായി ബാധിക്കുന്നുണ്ട്.

മത്സ്യത്തൊഴിലാളികളുടെ ജീവിതത്തെ എരിതീയില്‍ നിന്നും വറചട്ടിയി ലേക്ക് എറിയുന്ന ഈ സന്ദര്‍ഭത്തിലും സര്‍ക്കാറുകള്‍ ഈ വിഭാഗങ്ങ ളോടുള്ള അവഗണന തുടരുകയാണ്. കഴിഞ്ഞ രണ്ട് സാമ്പത്തിക വര്‍ഷങ്ങളില്‍ മത്സ്യ മേഖലയിലെ പദ്ധതി വിഹിതം ചെലവഴിക്കുന്നതില്‍ പോലും ഗുരുതരമായ അലംഭാവമാണ് സര്‍ക്കാര്‍ കാണിച്ചത്

പട്ടിക 8. 2012-13, 2013-14 കാലയളവിലെ മേഖല/പദ്ധതി ബജറ്റ് വിഹിതം/ചെലവ് എന്നീ ക്രമത്തില്‍

സംസ്ഥാനപദ്ധതി 21303/18570, 22833/17915
കേന്ദ്രാവിഷ്‌കൃതപദ്ധതി 571/4036, 5268/4363
എന്‍സിഡിസി 1800/1634, 1800/1736
അധിക കേന്ദ്ര സഹായം 400/400, -/-
ആകെ 28,774/24640, 29901/24014

അവലംബം: ഫിഷറീസ് ഡയറക്ടറേറ്റ്, സാമ്പത്തിക അവലോകന കമ്മിറ്റി റിപ്പോര്‍ട്ട്.

പൊതു സമൂഹത്തിന് പോഷകമൂല്യമുള്ള ഭക്ഷ്യ സുരക്ഷയും രാജ്യത്തിന് വിദേശ നാണ്യവും നേടിത്തരുന്ന, വികസനത്തിന്റെ ഗുണഫലങ്ങള്‍ ഒന്നും ലഭിക്കാത്ത, ഒരു വിഭാഗത്തിന്റെ ഉന്നമനത്തിനായി നീക്കിവെക്കുന്ന തുച്ഛമായ തുകകള്‍ പോലും ചെലവഴിക്കുന്നതില്‍ സര്‍ക്കാരുകള്‍ താത്പര്യം കാണിക്കുന്നില്ല. ചെലവഴിച്ച തുകകള്‍ തന്നെ, ഒാരുജല മത്സ്യവികസന പദ്ധതികള്‍ക്കും ഉദ്യോഗസ്ഥന്മാരുടെ സൗകര്യത്തിനു മായാണ്. ദുര്‍ബലരായ ഒരു സമൂഹത്തിന്റെ വികസനത്തിന് സര്‍ക്കാരു കളുടേയും പൊതു സമൂഹത്തിന്റേയും അടിയന്തിരവും ആത്മാര്‍ത്ഥവു മായ ശ്രമങ്ങള്‍ ഉണ്ടാകേണ്ടിയിരിക്കുന്നു.