"Until the lions have their own historians the history of the hunt will always glorify the hunter...."
- Chinua Achebe

2015, ഓഗസ്റ്റ് 14, വെള്ളിയാഴ്‌ച

റിപ്പബ്ലിക്കിനെ ക്കുറിച്ചൊരു ഗീതം ; പട്ടിയെക്കുറിച്ചും - നാംദിയോ ദാസല്‍

ശ്വാനന്‍; കെട്ടിയിട്ട ശ്വാനന്‍
അവന്‍ മോങ്ങുകയും
കുരക്കുകയും ചെയ്തു, അപ്പപ്പോള്‍
ഇതവന്റെ ഭരണഘടനാദത്തമായ 
അവകാശമാകുന്നു;
അവന്‍ ചീത്തയായ 
എച്ചില്‍ തിന്ന് വളരുന്നു.


അവനനുഭവിച്ച
അനീതികള്‍
അവന്റെ മനസിനെ 
കര്‍ക്കശമാക്കിയിരിക്കുന്നു.
കലഹനിമിഷത്തില്‍
അത് അസഹ്യമാവുകില്‍
അവന്‍ അവന്റെ കഴുത്തുവട്ടയില്‍ ചാടും.
ചങ്ങലകളെ പൊട്ടിച്ചെറിയാന്‍ ശ്രമിക്കും.
അവനെ അപ്പോള്‍
വെടിവെക്കും.
തിങ്ങിനിറഞ്ഞ തെരുവുകളില്‍
സ്വാതന്ത്ര്യത്തിന്റെ
പെരുമ്പറ മുഴക്കം:
കൂട്ടുകാരാ, പരിഛേദന കഴിയാത്ത
ഒരു കുട്ടിയോട് ചോദിച്ചേന്‍,
ജനാധിപത്യത്തിന്റെ 
പൊരുളെന്ത്?
നിങ്ങള്‍ത്തതിനോട്
ചായ് വുണ്ടോ?

...........................................

എത്രഭീകരം, എത്ര ഭീകരം
ഈ തലമുറ!
കൊള്ളക്കാരുടെ തലമുറ.
വിളക്കുകളെക്കുറിച്ചു
വെള്ളത്തെക്കുറിച്ചുപോലും
നമുക്ക് സംസാരിക്കാനാവുന്നില്ല.
നശിച്ചുപോയ, വിശപ്പിന്റെ
ഇരുണ്ട സാമ്രാജ്യം
ഭീദിതമായ പെരുമ്പാമ്പ്
അതിലിഴയുന്നു.
കരയാന്‍ പോലും അനുവാദമില്ലാത്ത നമ്മള്‍
സ്വാതന്ത്ര്യം, തുല്യത, സൗഭ്രാത്രം!
സ്വകാര്യസ്വത്തിന്റെ ആല്‍മരം!
നിയമത്തിന്റെ മുമ്പില്‍
എല്ലാം തുല്യമാകുന്നു!
തിന്നുക, കുടിക്കുക, ആനന്ദിക്കുക.
നരകത്തിലേക്ക് പോകുക.

.................................................

വരണ്ട കുടീരങ്ങള്‍
മനസിന്റെ തിരശീലയില്‍
തെളിയുന്നു.
ജനാധിപത്യത്തെക്കുറിച്ച്
പ്രശംസാഗാനങ്ങള്‍
കെട്ടിയേല്പിക്കുന്നു!
സങ്കരത്വമോ അസങ്കരത്വമോ
ഏത് തന്തയില്ലാത്തവനാണ്
നമുക്കിത് തന്നത്?
ഇത് മാംസത്തില്‍ വളരുകയില്ല!
ഇത് രക്തത്തില്‍ കലരുകയില്ല!
അധ്വാനിക്കുന്നവര്‍ക്കും
തളര്‍ന്നവര്‍ക്കും
ഇത് തണലേകുകയില്ല.
ഒരു റെഡിമേഡ് എര്‍ട്ടുപോലെ
ഇത് ശരീരത്തിന്
പാകമാകുകയുമില്ല.
ഉടലിലെ തുറിച്ച മുറിവുകള്‍
മാഞ്ഞു പോവുകയില്ല.
ഞങ്ങള്‍ ഭവനരഹിതരാകുന്നു.
ഞങ്ങള്‍ ശ്മശാനഭൂമിയില്‍ നിന്ന് 
മടങ്ങുമ്പോള്‍,
ഞങ്ങള്‍ വിട്ടെറിഞ്ഞ വീടുകളെ
കാറ്റിന് ന്‌ലകുന്നു.
-----------------------------
വിവര്‍ത്തനം: പോള്‍ ചിറക്കരോട്.
കടപ്പാട്: 'പടവുകള്‍' മാസിക. 2004 ജൂലൈ ലക്കം.