"Until the lions have their own historians the history of the hunt will always glorify the hunter...."
- Chinua Achebe

2016, ജൂലൈ 24, ഞായറാഴ്‌ച

കുറവര്‍; തൊഴിലും ജീവിതമാര്‍ഗങ്ങളും - കുന്നുകുഴി എസ് മണി


ജീവസന്ധാരണത്തിന് ഇവര്‍ ആദ്യകാലത്ത് കൃഷിയില്‍ ഏര്‍പ്പെട്ടിരുന്നു. സംഘകാലത്ത് ഇവര്‍ ചാമ, തിന, വരക്, എള്ള്, കരിമ്പ്, ചെന്നെല്ല് മുതലായ ധാന്യങ്ങള്‍ കൃഷി ചെയ്യുന്നതിന് കുറിഞ്ഞി നിലങ്ങള്‍ ഉപയോഗിച്ചിരുന്നു. കാലക്രമേണ മറ്റു ചില തൊഴിലുകളിലും കുറവര്‍ ഏര്‍പ്പെട്ടു. എങ്കിലും മറ്റ് ജനവിഭാഗങ്ങളോടൊപ്പം കുറവരില്‍ ഒരു വിഭാഗം കൃഷിപ്പണിയില്‍ തന്നെ ഉറച്ചു നിന്നു. കൃഷിയുടെ ആചാര്യന്മാരായ പുലയരോടൊപ്പം നെല്‍കൃഷി യില്‍ നൈപുണ്യം നേടിയ കുറവ കര്‍ഷകര്‍ ഏറെയാണെന്നു കാണാം.

കാലാന്തരത്തില്‍ ഹസ്ത രേഖയിലും മുഖലക്ഷണ ശാസ്ത്രത്തിലുമെല്ലാം കുറവരിലെ വിദ്യാ സമ്പന്നര്‍ കടന്നുവന്നു. ഇവരിലെ സ്ത്രീകളും രേഖാശാസ്ത്രം, അംഗലക്ഷണം, മുഖലക്ഷണം, പക്ഷിശാസ്ത്രം എന്നിവയില്‍ നിപുണരായി മാറി. ജ്യോതിശാസ്ത്രത്തിന്റെ ഉത്പത്തിയും ആദിദ്രാവിഡ കുലജാതരായ കുറവരില്‍ നിന്നുമാണ്. ഇവരുടെ കുലഗുരുവായ മുരുകദേവനില്‍ നിന്നും ദേവലോകവാസികളായ കുറവസ്ത്രീകള്‍ മനസിലാക്കി ഭാവിഫലങ്ങള്‍ പ്രവചിക്കാന്‍ തുടങ്ങി. അങ്ങിനെയാണ് ആ വിദ്യ പുരുഷന്മാര്‍ക്കും പകര്‍ന്നു കിട്ടിയത് എന്നാണ് 'വള്ളിയൂര്‍ പുരാണത്തില്‍' കാണുന്നത്. കുറവസ്ത്രീകളുടെ പാണ്ഡിത്യ ദര്‍ശനത്തെക്കുറിച്ച് സംഘകാലകൃതികളിലും വ്യക്തമാണ്. ഹസ്തരേഖാ ശാസ്ത്രത്തിലുപരി സാഹിത്യ കലകളിലും സംഗീതകലയിലും നാട്യകല യിലും കുറവര്‍ പ്രശസ്തിനേടിയിരുന്നുവെന്നാണ് 'പുറനാനൂറ്' പറയുന്നത്.

ഹസ്തരേഖാ ശാസ്ത്രപ്രവചനത്തില്‍ കൈരേഖകള്‍ കൂടാതെ കയ്യുടെ ആകൃതി, ത്വക്ക്, നിറം, കറുത്തും വെളുത്തതുമായ മറുകുകള്‍, (പുള്ളികള്‍) പാടുകള്‍, നഖം എന്നിവയെല്ലാം നോക്കി ഫലം പ്രവചിക്കാന്‍ കുറവര്‍ അതിസമര്‍ത്ഥരാണ്. ഇവരെ വെല്ലാന്‍ മറ്റൊരു ജാതിക്കാര്‍ക്കും കഴിയില്ല. ജ്യോതിഷത്തെപ്പോലെ 12 രാശികളും 9 ഗ്രഹങ്ങളും (ഇപ്പോള്‍ ഗ്രഹങ്ങള്‍ കൂടുതലുണ്ട്) അവയുടെ ഫലങ്ങളുമെല്ലാം പരിശോധിച്ചാണ് രേഖാശാസ്ത്ര പ്രവചനം ഇവര്‍ നടത്തിയിരുന്നത്. അത് അവരുടെ തൊഴിലും ജീവിത മാര്‍ഗവുമായിരുന്നു. ഇന്നതെല്ലാം മറ്റ് ജാതിക്കാര്‍ കൊണ്ടുപോയി. പക്ഷെ ഫലപ്രഖ്യാപനത്തിലെ അസന്തുലിതാവസ്ഥ നിലനില്ക്കുന്നുവെന്നത് നിഷേധിക്കാനാവില്ല.