"Until the lions have their own historians the history of the hunt will always glorify the hunter...."
- Chinua Achebe

2016, ജൂലൈ 26, ചൊവ്വാഴ്ച

സ്വര്‍ണവും ഇന്ത്യന്‍ സമ്പദ് വ്യവസ്ഥയും - ശശിക്കുട്ടന്‍ വാകത്താനം


വാണിജ്യത്തിലെ പ്രധാനപ്പെട്ട ഘടകം കയറ്റുമതിയും ഇറക്കുമതിയുമാണ്. കയറ്റുമതി കൂടുകയും ഇറക്കുമതി കുറയുകയും ചെയ്യുമ്പോള്‍ വ്യാപാരമിച്ചവും തിരിച്ചായാല്‍ വ്യാപാര കമ്മിയും അനുഭവപ്പെടും. ഇത് വ്യാപാരത്തെ സംബന്ധിച്ച ലളിതമായ കണക്കാണ്. സ്വര്‍ണം, ക്രൂഡോയില്‍ ഇവയുടെ വിലയില്‍ ഉണ്ടാകുന്ന വ്യത്യാസം, പണപ്പെരുപ്പം, ഡോളറിന്റെ ഉയര്‍ച്ച-താഴ്ച ഇവ വ്യാപാരത്തെ ബാധിക്കുന്ന ഘടകങ്ങളാകുന്നതോടെ മുകളില്‍ പറഞ്ഞ ലളിത സമവാക്യങ്ങള്‍ കൂടുതല്‍ സങ്കീര്‍ണമാകുന്നു. 2014 ഏപ്രില്‍ മധ്യത്തില്‍ സ്വര്‍ണവില കുറയാന്‍ കാരണം അമേരിക്കയിലെ സാമ്പത്തിക മാന്ദ്യത്തില്‍ അയവു വന്നതാണ്. സ്വര്‍ണത്തിന്റെയും ക്രൂഡോയിലിന്റെയും വിലയില്‍ കുറവു വന്നതോടെ ഡോളര്‍ കരുത്താര്‍ജ്ജിച്ചു. അതോടെ സ്വര്‍ണത്തില്‍ നിക്ഷേപം നടത്തിയവര്‍ അവിടെ നിന്നും പിന്‍വലിഞ്ഞതാണ് സ്വര്‍ണവിലയില്‍ കുറവുണ്ടാകാന്‍ കാരണം.

സ്വര്‍ണവില 2014 ഏപ്രില്‍ 10 മുതല്‍ 18 വരെ

2014 ഏപ്രില്‍ 10- പവന് 22,040 രൂപ
2014 ഏപ്രില്‍ 11- പവന് 21,840 രൂപ
2014 ഏപ്രില്‍ 12- പവന് 21,760 രൂപ
2014 ഏപ്രില്‍ 13- പവന് 21,200 രൂപ
2014 ഏപ്രില്‍ 14- പവന് 19,720 രൂപ
2015 ഏപ്രില്‍ 15- പവന് 20,000 രൂപ

സ്വര്‍ണ വാണിജ്യരംഗം ഇന്ത്യന്‍ സമ്പദ്ഘടനയെ കാര്യമായി ബാധിക്കുന്നു എന്നത് അനുഭവപാഠമാണ്. ഒരു പവന്‍ സ്വര്‍ണം പോലും ഉല്പാദിപ്പിക്കാത്ത രാജ്യമായ ഇന്ത്യയിലെ സ്വകാര്യ വ്യക്തികളുടെയും സ്ഥാപനങ്ങളുടെയും കൈകളിലായി ലോകത്താകെയുള്ള ഉല്പാദനത്തിന്റെ ആറില്‍ ഒന്നു സ്വര്‍ണമുണ്ട്. (ലോകത്താകെ സ്വര്‍ണ ഉല്‍പാദനം 1,7,300 ടണ്‍. ഇന്ത്യയില്‍ പലരുടെ കൈകളിലായി 25,000 ടണ്‍). ഇങ്ങനെ സ്വര്‍ണത്തിന്റെ വലിയൊരു ശേഖരം ഉള്ളപ്പോഴും വീണ്ടും സ്വര്‍ണം ഇറക്കുമതി ചെയ്തുകൊണ്ടിരിക്കുന്നു എന്ന ദുരന്തമാണ് ഇന്ത്യ നേരിട്ടുകൊണ്ടിരിക്കുന്നത്. ഈ പശ്ചാത്തലത്തി ലാണ് 2013ല്‍ സ്വര്‍ണ ഉപഭോഗം കുറക്കണമെന്ന് ധനമന്ത്രി ചിതംബരം അഭിപ്രായപ്പെട്ടത്. രാജ്യത്തിന്റെ വ്യാപാര ശിഷ്ട പ്രതിസന്ധിക്ക് പ്രധാന കാരണം സ്വര്‍ണ ഇറക്കുമതിയാണ്. 2013-14ല്‍ ഇന്ത്യയില്‍ നിന്നുള്ള കയറ്റുതി 3,18,607 മില്യന്‍ ഡോളര്‍ ആയിരുന്നപ്പോള്‍ ഇറക്കുമതി 4,66,216 മില്യന്‍ ഡോളര്‍ ആയിരുന്നു. കയറ്റുമതിയേക്കാള്‍ 1,47,609 മില്യന്‍ ഡോള്‍ കൂടുതലായിരുന്നു ഇറക്കുമതി. ഇതുമൂലം ഇന്ത്യയുടെ വിദേശ നാണയ കമ്മി 5 ശതമാനത്തി ലേറെയായി. ഇന്ത്യയിലെ മൊത്തം ജനങ്ങളുടെ വികസനത്തിനായി ഉപയോഗിക്കേണ്ടിവരുന്ന ധനം കുറെ ധനവാന്‍മാര്‍ക്കു മാത്രമായി വിനിയോഗിക്കുന്നതാണ് നാം ഇവിടെ കാണുന്നത്.


ഇന്ത്യയിലെ സ്വര്‍ണ ഉപഭോഗത്തെക്കുറിച്ചും സ്വര്‍ണം സൂക്ഷിച്ചുവച്ചിരി ക്കുന്നതിനെക്കുറിച്ചും വേള്‍ഡ് ഗോള്‍ഡ് കൗണ്‍സില്‍ ആശങ്ക രേഖപ്പെടു ത്തുന്നു. ഇന്ത്യയിലെ വീടുകളില്‍ സൂക്ഷിച്ചിരിക്കുന്ന സ്വര്‍ണം 25,000 ടണ്‍ ആണ്. ഇതിന്റെ ഇപ്പോഴത്തെ മൂല്യം 62 ലക്ഷം കോടി രൂപ വരും. ഇതിന്റെ ഒരു ശതമാനം പണമാക്കിയാല്‍ രാജ്യത്തെ സ്വര്‍ണ ഇറക്കുമതി കുറക്കാനാ വുമെന്ന് വേള്‍ഡ് ഗോള്‍ഡ് കൗണ്‍സില്‍ റിപ്പോര്‍ട്ടില്‍ പറയുന്നു. പഴയ സ്വര്‍ണം സംസ്‌കരിച്ച് ഉല്‍പാദനം വര്‍ദ്ധിപ്പിക്കുന്നതിലും ഇന്ത്യാക്കാര്‍ പിന്നിലാണ്. 987 ടണ്‍ സ്വര്‍ണം വാര്‍ഷിക ആവശ്യമുള്ളപ്പോള്‍ സംസ്‌കരി ക്കപ്പെടുന്നത് 102 ടണ്‍ മാത്രമാണ്. 210 ടണ്‍ ഉപഭോഗമുള്ള അമേരിക്കയില്‍ 335.9 ടണ്‍ സ്വര്‍ണമാണ് ഉല്‍പാദിപ്പിക്കുന്നത്.

താഴെ കൊടുത്തിരിക്കുന്ന പട്ടിക ഇന്ത്യയുടെ സ്വര്‍ണ ആവശ്യത്തിന്റെ വര്‍ദ്ധന ഇരട്ടിയില്‍ അധികമാണെന്നു കാണിക്കുന്നു.


കേരളത്തില്‍ സര്‍ക്കാര്‍ പുറത്തുവിട്ട കണക്കുപ്രകാരം ആകെ സ്വര്‍ണ നിക്ഷേപം 207 ടണ്‍ ആണ്. (ഇതില്‍ എത്രയോ കൂടുതലായിരിക്കും യഥാര്‍ത്ഥ കണക്ക്.) ഡന്‍മാര്‍ക്ക്, സിംഗപ്പൂര്‍, ദക്ഷിണാഫ്രിക്ക, മെക്‌സിക്കോ, ഓസ്‌ട്രേലിയ, ബ്രസീല്‍, കുവൈത്ത്, അര്‍ജന്റീന എന്നീ രാജ്യങ്ങളിലെ സ്വര്‍ണ കരുതല്‍ ശേഖരണത്തെക്കാള്‍ ഇരട്ടിയില്‍ അധികം വരുമിത്. കരുതല്‍ സ്വര്‍ണശേഖരത്തില്‍ 11-10 സ്ഥാനമുള്ള ഇന്ത്യയുടെ കരുതല്‍ ശേഖരണം 557.7 ടണ്‍ ആണ്. കേരളത്തിലെ മൂന്നു പണമിടപാടു സ്ഥാപനത്തിലേതു മാത്രം 207 ടണ്‍ വരും. കേരളത്തിലെ മൊത്തം കണക്കെടുത്തു മാത്രം പരിശോധിച്ചാല്‍ ഇന്ത്യാ രാജ്യത്തെ തൂക്കിവാങ്ങാന്‍ കേരളത്തിലെ രണ്ടോ മൂന്നോ സ്വര്‍ണ വ്യാപാരികള്‍ക്കു മാത്രം കഴിയും.

ഇന്ത്യയിലെ മൊത്തം കയറ്റുമതിയിലെ 17.50 ശതമാനം സ്വര്‍ണാഭരണമാണ്. ഇതില്‍ കേരളത്തിന്റെ പങ്ക് 14 ശതമാനം വരും. പ്രതിവര്‍ഷം 2 ടണ്ണിലേറെ കയറ്റുമതി ചെയ്യുമ്പോള്‍ കേരളത്തിലെ സ്വര്‍ണ വിപണിയില്‍ 200 ടണ്‍ സ്വര്‍ണം വില്‍പ്പന നടത്തുന്നു. 6000 ജ്വല്ലറികള്‍ (5 ലക്ഷത്തിനു മുകളില്‍ വിറ്റുവരവുള്ളവ) മാത്രമാണ് സെയില്‍ ടാക്‌സ് അടക്കുന്നവ. ബാക്കി പതിനായിരക്കണക്കിനു വരുന്ന സ്ഥാപനങ്ങള്‍ കണക്കില്‍ ഉള്‍പ്പെടുന്നില്ല.

കേരളത്തിലെ സ്വര്‍ണ വ്യാപാര മേഖലയില്‍ സ്വാധീനം ചെലുത്തിയിരുന്നത് മുംബൈ വിപണിയായിരുന്നു. ഇന്നതു തകര്‍ച്ചയിലാണ്. തല്‍സ്ഥാനത്തേക്ക് അഹമ്മദാബാദ്, കൊല്‍ക്കത്ത, നെല്ലൂര്‍, കോയമ്പത്തൂര്‍ എന്നിവിടങ്ങളില്‍ നിന്നാണ് ആഭരണങ്ങള്‍ എത്തിക്കൊണ്ടിരിക്കുന്നത്. യന്ത്രങ്ങളുടെ സഹായത്തോടെ പുതിയ ഡിസൈനുകളില്‍ കൂടുതല്‍ ഉല്‍പാദനം നടത്താന്‍ കഴിയുന്നതോടെ കൂടുതല്‍ വിപണിയുടെ ആവശ്യം വേണ്ടിവരുന്നു. ഇതു പരിഗണിക്കുമ്പോള്‍ സ്വര്‍ണത്തിന്റെ പരിശുദ്ധിയില്‍ മായം കലര്‍ത്തി ഉപഭോക്താക്കളെ വഞ്ചിക്കുന്ന കാര്യത്തിലും ഇവര്‍ പിന്നിലല്ല. ഇതിനെ മറി കടക്കാന്‍ 'പരമ്പരാഗതം' എന്നു പേരു ചേര്‍ക്കുന്നതിലാണ് ചെറുകിടക്കാര്‍ മുതല്‍ വന്‍കിടക്കാര്‍ വരെ ശ്രദ്ധിക്കുന്നത്.

കോഴിക്കോടും തൃശൂരും ജില്ലകള്‍ കേന്ദ്രീകരിച്ചു മാത്രം 3000 ആഭരണ നിര്‍മ്മാണ യൂണിറ്റുകള്‍ പ്രവര്‍ത്തിക്കുന്നു. 2 ലക്ഷത്തിലേറെപ്പേര്‍ ഇവിടെ ജോലി ചെയ്യുന്നുണ്ടെന്നാണ് ജം ആന്റ് ജ്വല്ലറി കണ്‍വീനര്‍ പറയുന്നത്. പരമ്പരാഗത സ്വര്‍ണപ്പണിക്കാര്‍ ഒരു ശതമാനം പോലും ഇവിടെ പണിയെടുക്കുന്നില്ല. കേരളത്തിലെ 5870 ജ്വല്ലറികളില്‍ പരിശോധിച്ചാല്‍ 100ല്‍ താഴെ മാത്രമാണ് പരമ്പരാഗത സ്വര്‍ണ തൊഴിലാളികള്‍ ഉണ്ടാവുക.