"Until the lions have their own historians the history of the hunt will always glorify the hunter...."
- Chinua Achebe

2016, ജൂലൈ 3, ഞായറാഴ്‌ച

വര്‍ത്തമാനം - സണ്ണി കവിക്കാട്


സുഹൃത്തേ, സഖാവേ
ഇനിയെന്തുപറയുവാന്‍
സാമ്രാജ്യം പ്രതിസന്ധി
എന്തിനീ വാക്കുകള്‍ സഖാവേ - 

ഈ മണല്‍ക്കാടുകളില്‍ 
ഒരുറവ ജനിക്കുമോ?
ഈ വൃദ്ധജാരങ്ങളില്‍
ഇനി തലമുറ ജനിക്കുമോ?

അക്ഷരക്കൂനകള്‍ തട്ടിനിരത്തിയ
സംവാദരാവുകളെത്ര കഴിഞ്ഞു
വീണ്ടുമാ വാക്കുകള്‍, വാചകം
വഴിയോരക്കാഴ്ചകളെല്ലാം
നിരത്തുന്നതെന്തിനു സഖാവേ?

കഷ്ടിച്ച പലിശകള്‍ മാത്രം 
വിളയുന്ന പാടത്തു കരിയും
പകലിന്‍ തുപ്പായി മാറിയ
ചെറുമിതന്‍ സ്വപ്നത്തെ
ചുംബനം കൊണ്ടുനീയിന്നു
പൊതിഞ്ഞതും പ്രണയം നിറഞ്ഞ
മനസ്സുമായത്താഴം പങ്കിട്ടു രാവു
കഴിച്ചതും എന്തിനു സഖാവേ - 


ആസ്മതന്‍ പിടിയില്‍ കുറുകും
അമ്മതന്‍ നെഞ്ചിന്റെ രാഗം
താരാട്ടുപാട്ടായി, പിന്നെയതു
ഉണര്‍ത്തുപാട്ടാക്കി രാവിന്റെ
രാവിലേക്കെന്തിനു മറഞ്ഞു നീ

കോട്ടകള്‍ കൊടുമുടി - തേരുകള്‍
സ്വന്തമായിത്തീരുന്ന 
ഒരുനാള്‍ തഴമ്പാര്‍ന്ന
കൈകളിലധികാരമേന്തി
ന്യായം വിധിക്കും. പിന്നീട്
സര്‍വം സമം എന്നു
പറഞ്ഞതോര്‍ക്കുന്നുവോ?

ഉമിനീരു നുണഞ്ഞു - നീ
മിണ്ടാതിരിക്കുന്നതെന്തിന്?

കവചിത വാഹനമോടും
വഴിയൂടങ്ങോട്ടുപോകും
അറിയാത്ത വഴിയിലൂടെ
ഇനിയെത്ര യാത്ര സഖാവേ?

കത്തുന്ന ഗ്രാമത്തിലേക്കു നീ പോരുക
കാറ്റില്‍ കളിക്കുന്ന തീയൊണ്ടു
സൂക്ഷിച്ചു പോരുക സഖാവേ
നമുക്കിനി വെണ്ണീറില്‍ നിന്നു
തുടങ്ങാം - സുഹൃത്തേ, സഖാവേ!

---------------------------------------
* പോള്‍ ചിറക്കരോടും എം സത്യപ്രകാശവും എബ്രഹാം അയിരുക്കുഴിയും ചേര്‍ന്ന് എഡിറ്റ് ചെയ്ത് 1992 ല്‍ പ്രസിദ്ധീകരിച്ച 'ദലിത് കവിതകള്‍ ഒരു പഠനം' എന്ന കൃതിയിലാണ് ഈ കവിത പ്രസിദ്ധീകരിച്ചു വന്നത്.