"Until the lions have their own historians the history of the hunt will always glorify the hunter...."
- Chinua Achebe

2016, ഓഗസ്റ്റ് 23, ചൊവ്വാഴ്ച

നിര്‍മാണമേഖല:ഗുഹാക്ഷേത്രങ്ങള്‍ - ശശിക്കുട്ടന്‍ വാകത്താനം


കേരളത്തിലെ നാടോടി ജീവിത പാരമ്പര്യം സ്ഥിരവാസത്തിലെത്തുന്ന കാലത്ത് രൂപപ്പെട്ടതാണ് കേരളത്തിലെ ഗുഹാക്ഷേത്രങ്ങള്‍. (ഇതിനെ ക്ഷേത്രങ്ങള്‍ എന്നു വിളിക്കുന്നതില്‍ അര്‍ത്ഥമില്ല) ഇരുമ്പുസംസ്‌കൃ തിയുടെ തുടര്‍ച്ചയായിരുന്നിരിക്കണം ഇത്. എടക്കല്‍ ഗുഹയെക്കുറിച്ച് അന്വേഷണം നടത്തിയ അന്നത്തെ മലബാര്‍ പോലീസ് സൂപ്രണ്ട് (1894) ഫ്രഡ് ഫാസറ്റിന് അവിടെ നിന്നും ഇരുമ്പുകൊണ്ടുള്ള ഒരു കല്ലുളി ലഭിക്കുകയുണ്ടായി. വടക്ക് എടക്കല്‍ മുതല്‍ തെക്ക് തിരുവനന്തപുരം വരെയുള്ള സ്ഥലങ്ങളില്‍ പലയിടങ്ങളിലായി ഗുഹാക്ഷേത്രങ്ങള്‍ കാണാം.

തിരുവനന്തപുരം ജില്ലയിലെ വിഴിഞ്ഞം, മടവൂര്‍പ്പാറ, കൊല്ലം ജില്ലയിലെ കോട്ടുക്കല്‍, പത്തനംതിട്ട ജില്ലയിലെ തൃക്കക്കുടി (കവിയൂര്‍) എറണാകുളം ജില്ലയിലെ പെരുമ്പാ വൂരുള്ള കല്ലില്‍, തൃശൂര്‍ ജില്ലയിലെ തൃക്കൂര്‍, ഇരുനിലക്കോട്, ഇടുക്കി ജില്ലയിലെ മറയൂര്‍, വയനാടു ജില്ലയിലെ ഇടക്കല്‍, കണ്ണൂര്‍ ജില്ലയിലെ കുന്നത്തൂര്‍പ്പാടി എന്നിവടങ്ങളിലെ ഗുഹകളില്‍ കണ്ടുവരുന്ന ചിത്രങ്ങളും ശില്‍പങ്ങളും കേരളചരിത്ര ത്തിലെ സുപ്രധാന ഈടുവയ്പ്പുകളാണ്.

ആന, മാന്‍, വേട്ടപ്പട്ടി ഇവയോടൊപ്പം ജ്യാമിതീയ രൂപങ്ങളും ആരക്കാലുള്ള ചക്രങ്ങളും ഇവിടെ കാണാന്‍ കഴിയും. മറ്റു ഗുഹാക്ഷേത്രങ്ങളില്‍ ദ്വാരപാലകര്‍, നന്ദി, ഗണപതി, വിഷ്ണു, ദക്ഷിണാമൂര്‍ത്തി, സന്യാസിമാര്‍, ശിവന്‍, ഭൂതഗണങ്ങള്‍, ഹനുമാന്‍ എന്നീ രൂപങ്ങള്‍ കൊത്തിവച്ചിരിക്കുന്നു. സ്ത്രീരൂപങ്ങളോ നൃത്തരൂപങ്ങളോ (പെരുമ്പാവൂരിലെ കല്ലില്‍ ക്ഷേത്രം ഒഴികെ, അവിടെ പത്തിനി (പത്മിനി) പ്രതിഷ്ഠയാണ്) കാണുന്നില്ല. വിഴിഞ്ഞത്തുള്ള ഗുഹാക്ഷേത്രത്തില്‍ പ്രതിഷ്ഠയില്ല.

മനുഷ്യാദ്ധ്വാനത്തിന്റെ ശക്തിയും നിശ്ചയദാര്‍ഢ്യവുമാണ് ഗുഹാക്ഷേത്രങ്ങള്‍. കരിങ്കല്‍ പാറകളെ പിളര്‍ത്താനും അതില്‍ ഭാവന ചെലുത്തി അതിനെ ശില്‍പ്പങ്ങളാക്കി മാറ്റാന്‍ കഴിഞ്ഞത് ശില്‍പികളുടെ അനിതരസാധാരണമായ കഴിവാണ്. ഈ അര്‍ത്ഥത്തില്‍ ഉത്തരേന്ത്യന്‍ ശില്‍പനിര്‍മ്മാണത്തേയും ദക്ഷിണേന്ത്യയിലെ തന്നെ തമിഴ്‌നാടിനെയും വച്ചുനോക്കുമ്പോള്‍ കേരളം എത്രയോ പിന്നിലാണ്. എന്നിരുന്നാലും ചരിത്രത്തിനവഗണിക്കാന്‍ കഴിയാത്ത ഈ നിര്‍മ്മാണപ്രവര്‍ത്തനത്തില്‍ നിന്നാണ് കേരളത്തിലെ വാസ്തുവിദ്യാശൈലിയും ശില്‍പവിദ്യയും വികസിച്ചതെന്നു വേണം കരുതാന്‍.

ഗുഹാക്ഷേത്രങ്ങളുടെ വിതരണത്തിന്റെ അടിസ്ഥാനം ഏതര്‍ത്ഥത്തിലാണ് നിര്‍വഹിക്കപ്പെട്ടിരിക്കുന്നത് എന്നു കണ്ടെത്തേണ്ടിയിരിക്കുന്നു. നമ്പൂതിരിമാരുടെ കേരളത്തിലെ 32 ഗ്രാമങ്ങളുമായി ഇതിനു ബന്ധമില്ലെന്നുള്ളതും ചരിത്രത്തെ പുനര്‍വായനക്കു വിധേയമാക്കുന്നു. ഈ ഗുഹാക്ഷേത്രങ്ങള്‍ കര്‍ഷകരെയും കൈത്തൊഴിലാളികളെയും ഉല്‍ക്കൊള്ളുന്ന ഓരോ അധിവാസ മാത്രകളായിരുന്നു.