"Until the lions have their own historians the history of the hunt will always glorify the hunter...."
- Chinua Achebe

2016, സെപ്റ്റംബർ 27, ചൊവ്വാഴ്ച

SCSP, TSP പദ്ധതികള്‍ നിര്‍ത്തലാക്കുന്നത് സംബന്ധിച്ച്..





ശ്രീ ................................................
ബഹുമാന്യ ......................................................

സര്‍,

പട്ടികജാതി-വിഭാഗക്കാരും പട്ടികേതര വിഭാഗക്കാരും തമ്മില്‍ നിലനില്‍ക്കുന്ന സാമ്പത്തിക അന്തരം അവസാനിപ്പിക്കുവാനായി പട്ടികവിഭാഗങ്ങളുടെ സാമ്പത്തിക വികസനത്തിനുവേണ്ടി 1978 മുതല്‍ പ്ലാനിംഗ് കമ്മീഷന്റെ നിര്‍ദ്ദേശാനുസരണം നടപ്പിലാക്കിവരുന്ന പദ്ധതികളാണ് Scheduled Castes Sub Plan (SCSP), Tribal Sub Plan (TSP) എന്നിവ. ഇതുപ്രകാരം പട്ടികവിഭാഗങ്ങളുടെ ജനസംഖ്യാനു പാതികമായ തുക പഞ്ചവല്‍സര പദ്ധതികളിലും ഓരോ വാര്‍ഷികബജറ്റിലും പ്ലാന്‍ഫണ്ടില്‍ മാറ്റിവയ്ക്കുകയും വിനിയോഗിക്കുകയും ചെയ്തുപോന്നു. എന്നാല്‍ 2014 ല്‍ പ്ലാനിംഗ് കമ്മീഷന്‍ നിര്‍ത്തലാക്കുകയും അതിലൂടെ പഞ്ചവസരപദ്ധതികള്‍ അവസാനിക്കുകയും ചെയ്തിട്ടുണ്ട്. പകരം സംവിധാനമായി 2015 ജനുവരി 1 മുതല്‍ നിലവില്‍ വന്ന നിതി ആയോഗിലൂടെ National Institute for Transforming India (NITI Aayog) പതിനഞ്ചു വര്‍ഷ പദ്ധതികളാണ് വിഭാവനം ചെയ്തിരിക്കുന്നത്.

പ്ലാനിംഗ് കമ്മീഷന്‍ നിര്‍ത്തലാക്കുകയും പഞ്ചവല്‍സര പദ്ധതികള്‍ അവസാനിക്കുകയും ചെയ്ത സാഹചര്യത്തില്‍ പട്ടികവിഭാഗങ്ങളുടെ സാമ്പത്തിക വികസനത്തിനായി പ്ലാനിംഗ് കമ്മീഷന്‍ ആവിഷ്‌ക്കരിച്ച Scheduled Castes Sub Plan (SCSP), Tribal Sub Plan (TSP) എന്നിവ തുടര്‍ന്നും നിലനില്‍ക്കുമോ എന്ന ആശങ്ക ഉത്തരവാദിത്തപ്പെട്ട ജനപ്രതിനിധികള്‍ തന്നെ ഉയര്‍ത്തിക്കഴിഞ്ഞിരി ക്കുകയാണ്. (പേപ്പര്‍കട്ടിംഗ് ഇതോടൊപ്പം വയ്ക്കുന്നു) ഈ സംവിധാനം അവസാനിച്ചാല്‍ പട്ടികവിഭാഗങ്ങളുടെ സാമ്പത്തിക പുരോഗതിക്കായി ജനസംഖ്യാനുപാതികമായ തുക വകയിരുത്തപ്പെടാത്തസാഹചര്യം നിലവില്‍വരികയും അത് പട്ടികവിഭാഗങ്ങളുടെ നിലനില്‍പ്പിനെ തന്നെ പ്രതികൂലമായി ബാധിക്കുകയും ചെയ്യും. ഇത് പട്ടികവിഭാഗങ്ങള്‍ക്കിടയില്‍ വലിയ ആശങ്ക ഉണര്‍ത്തിയിട്ടുണ്ട്.

പട്ടികജാതി വര്‍ഗക്കാരുടെ സാമ്പത്തിക വികസനത്തിനായി പ്ലാനിംഗ് കമ്മീഷന്‍ വിഭാവനം ചെയ്ത SCSP, TSP പദ്ധതികള്‍ നിതി ആയോഗിലും തുടരുമെന്നും അതിന്റെ നിര്‍വഹണത്തിനായി രൂപകല്‍പ്പനചെയ്ത ഉത്തരവുകളും മാര്‍ഗരേഖകളും നിതി ആയോഗിലും പ്രാബല്യത്തിലുണ്ടാവുമെന്നും ഉറപ്പ് ലഭിക്കേണ്ടതുണ്ട്. ഈ സാഹചര്യത്തില്‍ അങ്ങ് ഈ വിഷയത്തിലിടപെടുകയും അവസാനത്തെ പഞ്ചവല്‍സര പദ്ധതിയായ 12-ാം പദ്ധതി (2012-17) അവസാനിക്കാന്‍ 6 മാസം മാത്രം അവശേഷിക്കുന്ന ഈ വേളയില്‍ അത്തരമൊരു ഉറപ്പ് ജനങ്ങള്‍ക്ക് ലഭിക്കുവാന്‍ ഇന്ത്യയുടെ പരമോന്നത സഭകളിലൊന്നായ രാജ്യസഭയില്‍ ഈ വിഷയം ഉന്നയിച്ച് ബന്ധപ്പെട്ട മന്ത്രിമാരില്‍ നിന്നും അത്തരമൊരു ഉറപ്പ് നേടിയെടുക്കാന്‍ വേണ്ട അടിയന്തിര നടപടികള്‍ സ്വീകരിക്കണമെന്നും വിനയപൂര്‍വ്വം അഭ്യര്‍ത്ഥിക്കുന്നു.

വിശ്വസ്തതയോടെ
യു.പി. അനില്‍കുമാര്‍



Scheduled Castes Sub Plan (SCSP), Tribal Sub Plan (TSP) എന്നിവ 2017-18
കാലയളവുമുതല്‍ മുന്‍കാലത്തെപ്പോലെ തുടരുന്നതു സംബന്ധിച്ച്

*ബഹുമാനപ്പെട്ട ധനകാര്യ/ആസൂത്രണ/സാമൂഹ്യനീതി വകുപ്പു മന്ത്രി മറുപടി നല്‍കുമോ?

എ) പട്ടികജാതി-വര്‍ഗക്കാരുടെ സാമ്പത്തിക വികസനത്തിനായി ജനസംഖ്യാനുപാ തികമായി പദ്ധതിവിഹിതം എല്ലാബജറ്റിലും മാറ്റിവയ്ക്കുന്ന Scheduled Castes Sub Plan (SCSP), Tribal Sub Plan (TSP) എന്നിവ പ്ലാനിംഗ് കമ്മീഷന്‍ നിര്‍ത്തലാക്കി പകരം നിലവില്‍ വന്ന നിതി ആയോഗിലൂടെ രൂപീകരിക്കുന്ന വാര്‍ഷിക പദ്ധതികളിലും 2017-18 കാലയളവുമുതല്‍ തുടരുമോ?

ബി) SCSP, TSP വഴിയുള്ള പദ്ധതികളുടെ ഫലപ്രദമായ നിര്‍വഹണത്തിനായി കേന്ദ്രസര്‍ക്കാര്‍ നല്‍കി വന്നിരുന്ന പ്രത്യേക കേന്ദ്രസഹായമായ Special Central Assistance to SCSP & TSP 2017-18 മുതലുള്ള കാലയളവില്‍ നിതി ആയോഗിലൂ ടെയും തുടര്‍ന്ന് നടപ്പിലാക്കപ്പെടുമോ?

സി) SCSP, TSP വഴിയുള്ള പദ്ധതികളുടെ ഫലപ്രദമായ നിര്‍വഹണത്തിനായി കാലാകാലങ്ങളില്‍ വിവിധ മന്ത്രിമാരും ഗവണ്‍മെന്റ് സെക്രട്ടറിമാരും പ്ലാനിംഗ് കമ്മീഷനും പുറപ്പെടുവിച്ച ഉത്തരവുകള്‍, മാര്‍ഗരേഖകള്‍ തുടങ്ങിയവ 2017-18 കാലയളവുമുതല്‍ നിതി ആയോഗും പിന്‍തുടരുമോ?

ഡി) SCSP, TSP വഴിയുള്ള പദ്ധതികളുടെ ഫലപ്രദമായ നിര്‍വഹണത്തിനും മേല്‍നോട്ടത്തിനുമായി നിലവില്‍ നിതി ആയോഗിനുകീഴില്‍ സര്‍ക്കാര്‍ എന്തെങ്കിലും സംവിധാനം ഏര്‍പ്പെടുത്തിയിട്ടുണ്ടോ? ഉണ്ടെങ്കില്‍ വിശദമാക്കാമോ? ഇല്ലെങ്കില്‍ അത്തരമൊരു സംവിധാനം ആവിഷ്‌ക്കരിക്കുമോ?