"Until the lions have their own historians the history of the hunt will always glorify the hunter...."
- Chinua Achebe

2017, ജനുവരി 11, ബുധനാഴ്‌ച

നിശബ്ദതയുടെ ഉറക്കം - ബിജു രേവമ്മ


:::നിശബ്ദതയുടെ ഉറക്കം :::

🔥വിരിഞ്ഞാടിയ വാല്, വിശറി, വാലായ്മകള്‍
ഒന്നൊന്നായ്‌ ഒതുക്കിക്കെട്ടി, അക്കമിട്ടു ലിസ്റ്റാക്കി
അച്ചടിച്ച് അടുക്കി റബ്ബറിട്ട് വച്ചിട്ടും,
വോട്ടെന്ത്രത്തിലേക്ക് പോകുംവഴി അത്
വാലും തലയും കുരിശും കുന്നായ്മയുമായി
വേര്‍പിരിഞ്ഞു.

നാലാംനാള്‍ വോട്ടെണ്ണി ഫലമിറങ്ങി;
ചട്ടമ്പികള്‍ ഒത്തുകൂടി ചുറ്റുമിരുന്നു ചേര്‍ച്ചനോക്കി,
ക്രിസ്ത്യാനി വോട്ട് എയ്ക്ക്, മുസ്ലീംവോട്ട് ബിയ്ക്ക്
നായരോട്ടും, ഈഴവനോട്ടും സിയ്ക്ക്,
ഡി എങ്ങനാ ജയിച്ചേ.

ശരി, വീണ്ടും എണ്ണൂ,
ക്രിസ്ത്യാനി വോട്ടെല്ലാം എയ്ക്ക് കിട്ടിയില്ലേ,
ബിയ്ക്ക് പത്തില്‍പ്പത്ത് സീറ്റ് കിട്ടിയില്ലേ
അത് മാപ്പളേടെ വോട്ടല്ലേ അവരുടെ ബിയല്ലേ.
നായരോട്ടും, ഈഴവനോട്ടും വാങ്ങി,
സിയുടെ വോട്ട് അതാ അവിടവിടെ ഇരട്ടി മുക്കിച്ചില്ലേ.
പിന്നെ ഡി എങ്ങനെ ജയിച്ചു.

ബാ, പോകാന്‍ വരട്ടെ, ആ യന്ത്രം ഒന്നൂടെ കുടഞ്ഞിട്,
ക്രിസ്ത്യാനി-ഒക്കെ, ന്യൂനപക്ഷം-ഒക്കെ,
നായര് ഈഴവപക്ഷം-ഒക്കെ.
കോപ്പ്!
ആ കുന്ത്രം ഒറ്റത്തവണ ഒന്നൂടെ കുടഞ്ഞിട്.
ക്രിസ്ത്യാനി,മുസ്ലീം,നായര്,ഈഴവന്...
വീണ്ടും കുടഞ്ഞിട്ടു.
ക്രിസ്ത്യാനി,മുസ്ലീം,നായര്,ഈഴവന്...

ഇരുട്ടായി, ആളുറങ്ങി, രണ്ടുവെളുപ്പാകും വരെ,
പേശിഉരുട്ടി മുണ്ടുതെറുത്ത് തലങ്ങും വിലങ്ങും
ചട്ടമ്പികള്‍ നിന്ന്‍ മറിച്ചും തിരിച്ചും വോട്ടു ചിക്കിപ്പെറുക്കി.
അല്ലപിന്നെ, പേരില്ലാതെ വോട്ടുചെയ്ത
ആ നാറികളുടെ പെരെങ്ങും വരരുത്.
ക്കി..ക്കി..ക്കി..ക്കി..
ഏഴരവെളുപ്പിലെ കിളിക്കൂട് ചിലച്ചത് എന്നുകേട്ട്,
ആശാരി,മൂശാരി,അണ്ടന്‍,അടകോടന്‍,ചെമ്മാന്‍,

ചെരുപ്പുകുത്തി, പൊലെനും പറേനും തിരിഞ്ഞുകിടന്ന് ഉറങ്ങി.