"Until the lions have their own historians the history of the hunt will always glorify the hunter...."
- Chinua Achebe

2017, ഏപ്രിൽ 21, വെള്ളിയാഴ്‌ച

ഇന്ത്യയിലെ ഭരണവര്‍ഗം ഇറുക്കിയടക്കപ്പെട്ട ഒന്നാണ്.....!!!! അംബേഡ്കര്‍ പറഞ്ഞു... (ഡോ. അംബേഡ്കര്‍ സമ്പൂര്‍ണകൃതികള്‍. വാല്യം 17. പേജ് 64, 65)


എല്ലാ രാജ്യത്തുമുണ്ട് ഓരോ ഭരണവര്‍ഗം. എന്നാല്‍ ഇന്ത്യയിലുള്ളതുപോലെ സ്വാര്‍ത്ഥവും രോഗഗ്രസ്ഥവും അപായകരവും തലതിരിഞ്ഞതുമായ മനോഭാവമുള്ളതും, സ്വന്തം വര്‍ഗത്തിന്റെ അധികാരവും മഹത്വവും നിലനിര്‍ത്താന്‍ അടിമവര്‍ഗങ്ങളെ അടിച്ചമര്‍ത്തണമെന്നു വാദിക്കുന്ന നീചവും നിന്ദ്യവുമായ ജീവിതദര്‍ശനമുള്ളതുമായ ഒരു ഭരണവര്‍ഗം മറ്റെവിടെയെങ്കിലുമുണ്ടോ? ഉള്ളതായി അറിവില്ല. മറ്റു രാജ്യങ്ങളിലെ ഭരണവര്‍ഗങ്ങള്‍ സ്വന്തം വര്‍ഗക്കാരല്ലാത്തവര്‍ക്ക് അവരുടെ അവരുടെ സമൂഹത്തിലേക്ക് അത്ര പെട്ടെന്ന പ്രവേശനം അനുവദിക്കുകയില്ല. എന്നാല്‍ അവരുടെ നിലവാരത്തിലേക്കുയര്‍ന്നവര്‍ക്ക് പ്രവേശനം നിഷേധിക്കുകയില്ല. എന്നാല്‍ ഇന്ത്യയിലെ ഭരണവര്‍ഗം ഇറുക്കിയടക്കപ്പെട്ട ഒന്നാണ്. ഭരണവര്‍ഗത്തിന്റെ നിലവാരത്തിലേക്ക് അടിമവര്‍ഗങ്ങള്‍ ഉയരുന്നതു തടയാന്‍ ഏതുമാര്‍ഗം സ്വീകരിക്കാനും അവര്‍ തയാറാണ്.

ഫ്രാന്‍സില്‍ ഫ്രഞ്ചുവിപ്ലവത്തിനു മുമ്പ് ഒരു ഭരണവര്‍മുണ്ടായിരുന്നു. ജപ്പാനിലുമുണ്ടായിരുന്നു ഒരു ഭരണവര്‍ഗം; ജപ്പാന്‍ അതിന്റെ ഭരണഘടന ആധുനികവത്കരിക്കാന്‍ തീരുമാനിച്ച പത്തൊമ്പതാം ശതകത്തിലെ എഴുപതുകള്‍ക്കുമുമ്പ്. ഇരുരാജ്യങ്ങളിലും ഭരണവര്‍ഗങ്ങള്‍ അതു ദേശീയപ്രതിസന്ധിയുടെ സമയമാണെന്നു മനസിലാക്കുകയും പ്രഭുഭരണത്തില്‍ നിന്ന് ജനാധിപത്യത്തിലേക്കുള്ള മാറ്റം സുഗമമാക്കാന്‍ വേണ്ടി അവരുടെ പുരാതനമായ അവകാശങ്ങളും പ്രത്യേകാനുകൂല്യങ്ങളും കുടഞ്ഞെറിയുവാന്‍ തീരുമാനിക്കുകയായിരുന്നു.